अखबार नेपाल ट्रेन्डिङ

रामेछाप: रामेछापको उमाकुण्ड गाउँपालिकाको स्वास्थ्य संस्था, विद्यालय र वडा कार्यालयको खानेपानी धारामा दिसामा हुने जीवाणु ‘कोलिफर्म’ भेटिएको छ । स्वास्थ्य संस्था, विद्यालय र वडा कार्यालयले प्रयोग गरिरहेको १५ वटा धाराको खानेपानीको नमुना परीक्षण गर्दा दिसामा हुने जीवाणु ‘कोलिफर्म’ भेटिएको गाउँपालिकाको स्वास्थ्य शाखाले जनाएको छ ।

अहिले नेपालको विभिन्न स्थानमा खानेपानी फोहोर भएकै कारण हैजाको प्रकोप फैलिएपछि उमाकुण्ड गाउँपालिकाको वडा नं १ गुम्देलदेखि वडा नं ७ भुजी सम्मका स्वास्थ्य संस्था, विद्यालय र वडा कार्यालयका गरी १५ वटा धाराको खानेपानी उपत्यका खानेपानी लिमिटेड पानी/ढल गुणस्तर महाशाखा, महाँकालचौर काठमाडौँमा नमुना परीक्षण गर्दा सबै धाराको पानीमा दिसामा हुने जीवाणु ‘कोलिफर्म तथा ई कोली भेटिएको स्वास्थ्य शाखाले जनाएको छ ।

खानेपानीमा दिसामा हुने जीवाणु भेटिएकाले उमाकुण्ड गाउँपालिकामा पनि हैजा फैलन सक्ने सम्भावना रहेको भन्दै पानी पिउँदा उमालेर मात्रै पिउन स्वास्थ्य शाखाले गाउँपालिका वासीलाई आग्रह गरेको छ । स्वास्थ्य शाखाले यसबारेमा आवश्यक प्रचार प्रसार गरी पिउने पानी स्वच्छतामा विशेष जोड दिन गाउँपालिकाभित्रका विद्यालयहरूलाई पनि आग्रह गरेको छ ।