अखबार नेपाल ट्रेन्डिङ

काठमाडौं: श्री मानव सेवा फाउण्डेशनलगायत झण्डै एक दर्जन संघसंस्थाको आयोजनामा पशुपतिनाथ मन्दिर परिसरमा रहेको वनकालीमा आजबाट ऐतिहासिक श्री पशुपति कोटिहोम एवं १०८ श्रीमदभागवत विश्व कल्याण मासिक ज्ञान महायज्ञ-२०८१ सुरु भएको छ ।

महायज्ञ अवधिभर जगदगुरु, साधु, सन्त, महन्तका साथै सु-प्रशिद्ध कथा वाचिका परम पूज्य राधिका दासी माता, अन्तर्ष्ट्रिय कथा प्रवक्ता परम पुज्य देवी प्रतिभा जी, वाचन प्रवीण पण्डित श्री दीनवन्धु पोखरेल, श्रीमद् देवी भागवत वाचिका विदुषी डा. कान्ता भट्टराई र श्री राम कथा वाचिका देवी चन्द्रकला सखीले महायज्ञमा वाचन गर्नेछन् ।

विराट ज्ञानमहायज्ञमा १०८ पण्डितबाट विभिन्न पुराणको पाठ पारायण, वैदिक मन्त्रसहित अनवरत रूपमा नियमित हवन, कन्या पूजन, हजारौँको तुलादान, ज्येष्ठ नागरिकको सम्मान, ताण्डुलाचल चामलको पर्वत निर्माणलगायतको कार्यक्रम पनि नियमित रूपमा सञ्चालन हुने फाउण्डेशनले जनाएको छ ।

साउन महिनाभरि सयौं गुरुहरुद्वारा नियमित हवन तथा अनेकौं कर्म गरिने महायज्ञमा देश विदेशबाट कार्यक्रम अवधिभर विभिन्न सामाजिक अभियान्त तथा राजनेताहरुको उपस्थिति हुने आयोजकले जनाएको छ । साथै राष्ट्रिय तथा अन्तर्ष्ट्रिय स्तरमा ख्याति प्राप्त कलाकाहरुबाट विभिन्न गीत, संगीत, भजन, झाँकी, देवलीला, नृत्य आदिको पनि प्रस्तुति रहने आयोजक श्री मानव सेवा फाउण्डेसन, नेपालले जनाएको छ ।

श्री मानव सेवा फाउण्डेसन, नेपालले महायज्ञमा भव्य र सभ्य रुपमा सम्पन्न गर्नका लागि सामाजिक क्षेत्रमा महत्वपूर्ण योगदान पुर्याउने व्यक्तिहरुको मुल्यांकन गर्दै अभिनन्दन-पत्र र कदर-पत्रले नागरिक अभिनन्दन गर्ने समेत जनाएको छ ।