अखबार नेपाल ट्रेन्डिङ

काठमाडौं: नेपाली कांग्रेसले केन्द्रीय कार्यसमिति र संसदीय दलको संयुक्त बैठक जेठ ९ गते पार्टी मुख्य कार्यालय सानेपामा बोलाएको छ । बैठकको एजेन्डा समसामयिक राजनीतिकका सन्दर्भ राखिएको छ । सहकारी ठगीमा संसदीय छानबिन समितिको माग गर्दै संसद्‌मा अवरोध गरिरहेको कांग्रेसले सडक आन्दोलनमा जान संयुक्त बैठक बोलाएको बुझिएको छ ।

नेताहरूका अनुसार सहकारी ठगीमा जोडिएका गृहमन्त्री रवि लामिछानेमाथि संसदीय छानबिन समिति बनाउन सत्ता पक्ष तयार नभएपछि कांग्रेस सदनसँगै सडक आन्दोलनमा जाने तयारीमा जुटेको छ । यसअघि सोमबार दिउँसो बसेको कांग्रेससहितको विपक्ष दलहरुको बैठकले पनि सहकारी ठगीको मुद्दामा संसद्सँगै सडकमा पनि मोर्चाबन्दी गर्ने निर्णय गरेको थियो ।

सहकारी प्रकरणमा मुछिएका गृहमन्त्री रवि लामिछानेसँगै लाखौँ नेपाली जोडिएको सहकारीमा पीडितको रकम सुरक्षित गर्नका लागि छानबिन गर्नुपर्नेमा कांग्रेसले माग गर्दै आएको छ । आइतबार संसदमा लामिछानेलाई बोल्न दिँदै सभामुखले आफ्नो भूमिका बिर्सेर एमाले कार्यकर्ताको भूमिका निभाएको कांग्रेसको आरोप छ ।

सरकार पेलेरै जाने मनस्थितिमा देखिएपछि पीडित नेपालीको हकहितको नाममा सडक आन्दोलन समेत गर्नुको विकल्प नभएको तर्फ पनि कांग्रेस सचेत देखिएको छ । सोमबारको संसद बैठकमा विरोधकैबीच प्रधानमन्त्री पुष्पकमल दाहाल प्रचण्डले विश्वासको मत लिँदै कांग्रेसलाई यो घटनाको मूल्य चुकाउनुपर्ने चेतावनी दिएका छन् । कांग्रेसले पनि प्रतिक्रिया दिँदै जंगलबाट सिंहदरबारमा ल्याएको नबिर्सन सचेत गराएको छ ।