अखबार नेपाल ट्रेन्डिङ

काठमाडौं: बाँकेको राप्तीसोनारी गाउँपालिका–८ शमशेरगञ्जमा रोकिराखेको ट्रकमा बस ठोक्किँदा ७ जनाको मृत्यु भएको छ भने ३४ जना घाइते भएका छन् ।

दाङबाट बर्दियातर्फ जाँदै  गरेको ना ७ ख २३२१ नम्बरको बस बाँकेको शमशेरगञ्जमा रोकिराखेको ना ८ ख ६४०५ नम्बरको ट्रकमा शुक्रबार बेलुकी करिब ९ बजे ठोक्किएको हो । बिग्रिएर सडक छेउमा राखिएको सो ट्रकसँग बस ठोक्किँदा बसका चालक जुकबहादुर चन्दसहित ७ जनाको जनाको मृत्यु भएको बाँकेका प्रहरीले जानकारी दिएको छ ।

यस्तै बसमा सवार ठाकुरबाबा–९ का काशिराम थारु, कस्तुरी थापा, रुपा परियार, जयन्ती थारुको पनि मृत्यु भएको छ । यस्तै सोही नगरपालिका–७ का ६५ वर्षीय साधुराम थारुको पनि मृत्यु भएको छ । प्रहरीका अनुसार नाम नखुलेका अन्दाजी ३५ वर्षीय सहचालकको पनि मृत्यु भएको छ । घाइतेको उपचार कोहलपुरस्थित मेडिकल कलेजमा भइरहेको छ । प्रहरीका अनुसार बसमा ४१ जना सवार रहेको बताईएको ।