अखबार नेपाल ट्रेन्डिङ

रोल्पाः रोल्पाबाट दाङको घोराहीका लागि छुटेको ना ख २६१२ नम्बरको बस त्रिवेणी गाउँपालिका-७ तिला रिचीमा दुर्घटनामा हुँदा ४ जनाको मृत्यु भएको छ ।

घटनामा १९ जना घाइते भएका छन् । सहिद मार्ग अन्तर्गत रोल्पा बागमाराबाट दाङ घोराहीका लागि छुटेको बस सडकदेखि झन्डै १५० मिटर तल खसेको प्रहरीले जनाएको छ । बसमा २५ जना यात्रु सवार रहेका थिए ।

मृत्यु हुनेमा सबै रोल्पाकै यात्रु रहेका छन् । प्रहरीका अनुसार  परिवर्तन गाउँपालिका-३ का ४६ वर्षीय भक्तबहादुर विक, माडी गाउँपालिका-२ बस्ने २१ वर्षीय प्रकाश बाँठा, माडी गाउँपालिका-४ का ५० वर्षीय गोर्खे डाँगी र उनकी ५० वर्षीया श्रीमती हस्त डाँगीको मृत्यु भएको छ ।

दुर्घटना लगतै चालक फरार भएका थिए । एक घन्टापछि उनी सम्पर्कमा आएको प्रहरीले जनाएको छ । जिल्ला प्रहरी कार्यालयका अनुसार सात जना घाइतेलाई थप उपचारका लागि दाङको घोराहीतर्फ पठाइएको छ ।