अखबार नेपाल ट्रेन्डिङ

कैलाली: अछामको पञ्चदेवल विनायक नगरपालिकाका विनोद शाहीको हत्या आरोपमा नगरपालिकाका मेयर अम्बिका चलाउनेसहित ७ जनालाई प्रहरीले पक्राउ गरेको छ ।

गत जेठ २१ गते बिहान करिब १० बजे अछाममा मृत फेला परेका शाहीको हत्यामा संलग्न रहेको उजुरी परेपछि प्रहरीले उनीहरूलाई नियन्त्रणमा लिएको हो ।

जेठ १७ गते साँझ नेपाली कांग्रेस र नेकपा एमालेका कार्यकर्ताबीच पञ्चदेवलमा विवाद भएको थियो । विवादपछि बेपत्ता शाहीको शव २१ गते बिहान फेला परेको थियो । शाहीको हत्या भएको भन्दै नगरप्रमुख चलाउने सहित १३ जनाविरुद्ध आफन्तले जाहेरी दर्ता गरेका थिए ।

यसअघि जाहेरी दर्ता भएको मध्ये पाँचजनालाई पक्राउ गरेको र अन्य दुईजनालाई हिजो नियन्त्रणमा दिएको जिल्ला प्रहरी कार्यालय अछामले जनाएको छ ।

यससम्बन्धी थप रिपोर्ट प्रहरीले अदालतमा पेश गर्ने तयारी गरिरहेको छ । आज हत्या आरोपीलाई पक्राउ नगरिएको भन्दै प्रमुख प्रतिपक्षी दल नेकपा एमाले लगायत पाँच दलले यातायात अवरुद्ध गरेको थियो ।