हावाहुरीले रामेछापका ८८ घरको छाना उडायो
वि.सं.२०७८ चैत २० आइतवार १७:२२
रामेछाप: शनिबार रातीको हावाहुरीले रामेछाप जिल्लाको मन्थली नगरपालिका वडा नं ११ गेलुका ८८ घरको छाना उडाएको छ ।
तिव्र बेगमा आएको हावाहुरीका कारण गेलु नाटीलाका मात्र ३० भन्दा बढी घरको छाना उडाएको जिल्ला प्रहरी कार्यालय रामेछापका प्रहरी प्रमुख राजकुमार थिनले बताए ।
हावाहुरीले नाटीला आसपास गाउँका समेत गरेर ८८ घरको छाना उडाएको प्रहरीले जनाएको छ । छाना उडाएको मध्ये ५० घरमा बस्न नहुने भएको रामेछापका प्रहरी प्रमुख राजकुमार थिनले जानकारी दिए ।
छाना उडाएर विचल्नीमा परेका ५० परिवारलाई नेपाल रेडक्रसको सहयोगमा प्रहरीले पाल तथा अन्य सामग्रीहरु वितरण गरेको प्रहरीले जनाएको छ ।
हावाहुरीका कारण भएको क्षतिको विवरण संकलनको काम भइरहेकाले घरको छाना उडाउनेको संख्या अझ बढी हुन सक्ने प्रहरीको अनुमान रहेको छ ।
गेलु क्षेत्रमा हावाहुरीसँगै असिना पानी समेत परेको थियो । हावाहुरीका कारण गाउँमा बर्षैं पुराना रुखहरु ढलेको स्थानीयहरुले बताएका छन् ।
गाउँका ठुला ठुला पिपलका रुखहरु समेत हावाहुरीले ढलेको गाउँलेहरुले बताए । एकैछिनको हावाहुरीले समेत ठुलो क्षति गरेको रामेछापका प्रमुख जिल्ला अधिकारी दिपक पहाडीले बताए ।
अहिले प्रभावित क्षेत्रमा प्रहरी परिचालन गरेर तथ्याकं सकलन तथा सहयोगको काम भइरहेको प्रजिअ पहाडीले बताए ।
वि.सं.२०७८ चैत २० आइतवार १७:२२