अखबार नेपाल ट्रेन्डिङ

काठमाडौं: उपत्यकासहित देशभर आज बिहानैदेखि उच्च पहाडी र हिमाली जिल्लामा वर्षा सहित हिमपात भएको छ ।

पानी परेसँगै काठमाडौंको चन्द्रागिरि, फुल्चोकीसहित हुम्ला, सोलुखुम्बु, बझाङ, बाजुरा, बैतडी, डोटी, दार्चुला लगायत जिल्लाका उच्च हिमाली तथा पहाडी क्षेत्रमा हिमपात भएको छ ।

सुदूरपश्चिमका उच्च पहाडी तथा हिमाली जिल्लामा हिमपात भएको थियो । हिमपातसँगै चिसोले त्यस क्षेत्रको जनजीवन कष्टकर भएको छ ।

सुदूरपश्चिमका जिल्लामा बिहीबार दिउँसोदेखि पानी पर्न सुरु भएसँगै हिमपात समेत सुरु भएको  हो ।

हिमपातका कारण बझाङको टेलिफोन सेवा, यातायात सेवा र विद्युत् सेवा समेत ठप्प भएको छ । बैतडी–बझाङ जोड्ने जयपृथ्वी राजमार्ग अन्तर्गत ढोल्यामोड श्रीभावर लगायतका दर्जनभन्दा बढी ठाउँमा बाक्लो हिउँ परेको छ ।

जसका कारण लामो तथा छोटो दूरीमा चल्ने दर्जनौँ गाडीबीच बाटोमै अलपत्र परेका छन् ।

यस्तै डोटीको खप्तड, गोलादेउ, नापानी, चर्केकोलेक, बडिकेदारथान, अल्याडी, चौरीबाज, ओखरखाली, मुस्ताल, देउताल, शिखरगाथ क्षेत्रमा बिहीवारदेखि हिमपात भइरहेको छ ।

यस्तै, सोलुखुम्बुको सदरमुकाम सल्लेरीसहितका क्षेत्रमा भारी हिमपात भइरहेको छ ।

सडकमा बाक्लो हिउँ जमेका कारण गाडी चल्न सकेका छैन भने काठमाडौं लगायत बाहिरी जिल्लामा जाने गाडी छुट्न सकेका छैनन् ।

हिमपातका कारण तीन वटा राजमार्ग बन्द भएका छन् ।

यसैबीच कर्णाली प्रदेशको हिमाली जिल्ला हुम्लामा हिमपात हुँदा जनजीवन कष्टकर बनेको छ ।

हिमपातका कारण हवाई उडान प्रभावित भएको छ ।

नेपालगञ्ज र सुर्खेतबाट उडानमार्फत गरिँदै आएको खाद्यान्न ढुवानी हिमपातका कारण रोकिएको छ ।