अखबार नेपाल ट्रेन्डिङ

काठमाडौं: आईसीसी विश्वकप लिग २ अन्तर्गत नेपालमा जारी त्रिदेशीय श्रृङ्खला अन्तर्गत आज ओमान र अमेरिका प्रतिष्पर्धा गर्दैछन् । अन्तर्राष्ट्रिय एक दिवशीय खेलमा यी दुई टिम पहिलो पटक प्रतिष्पर्धा गर्दैछन् ।

लिग-२ मा समावेश सात देशमध्ये अमेरिका शीर्ष स्थानमा छ । उसले आठ खेलबाट १२ अंक बनाएको छ । ओमान दोस्रो स्थानमा छ । उसले सात खेल खेलेर १० अंक बनाएको छ । आज ओमानले अमेरिकालाई हराएमा अंक बराबरी गर्ने मौका पाउनेछ । हिजो भएको खेलमा नेपाललाई १८ रनले हराएको ओमान टियु मैदानको पीचमा अभ्यस्त भइसकेको छ । त्यसैले तुलनात्मक रुपमा ओमानलाई अमेरिका विरुद्ध प्रतिष्पर्धा गर्दा केही सहज हुनेछ ।

नेपाल र ओमानको खेल राम्रोसँग नियाल्ने मौका पाएको अमेरिकाले भने ओमानको कमजोरी र बलियो पक्ष राम्रोसँग केलाउने मौका पाएको छ । त्यसै अनुरुप अमेरिकाले तयारी पनि गरेको छ । आठ खेलबाट ६ जित हात पारेको अमेरिका उच्च मनोबलका साथ मैदानमा उत्रिनेछ ।