अखबार नेपाल ट्रेन्डिङ

काठमाडौं: सहिद स्मारक ‘ए’ डिभिजन लिग फुटबल आजदेखि काठमाडौंको दशरथ रंगशालामा सुरु हुँदै छ । लिगको उद्घाटन खेलमा मछिन्द्र फुटबल क्लब र ब्रिगेड ब्वाइज क्लबबीच प्रतिस्पर्धा हुनेछ ।

अखिल नेपाल फुटबल संघ एन्फाले बुधबार जारी गरेको खेल तालिका अनुसार लिगमा ‘ए’ डिभिजनका १४ क्बलबीच प्रतिस्पर्धा हुनेछ । एन्फाले हरेक राउन्डमा सात खेल सञ्चालन गर्नेछ । आइतबारदेखि प्रत्येक दिन दुई खेल हुनेछन् । लिगका लागि १४ वटै क्लबले खेलाडी अनुबन्धको तयारी सुरु गरेका छन् । दशरथ रंगशालामा साढे चार वर्षपछि लिग सञ्चालन हुन लागेको हो ।

१३औं दक्षिण एसियाली खेलकुद प्रतियोगिता सागको भव्य समापनसँगै दशरथ रंगशाला फेरि फुटबलमय हुने भएको छ । २०७२ सालको भूकम्पका कारण दशरथ रंगशालामा क्षति पुगेका कारण यहाँ फुटबल लगायत गतिविधि ठप्प बनेको थियो । लिगमा कुल ९१ खेल हुनेछ । लिगमा अंक तालिकाको शीर्ष स्थानमा रहने टोली च्याम्पियन बन्ने छ । विजेता टीमले ५० लाख रुपैयाँको पुरस्कार पाउने भएको छ । एन्फाले यसपटक रेलिगेसनसहितको लिग सञ्चालन गर्न लागेको हो । गत वर्ष मनाङ मस्र्याङ्दी क्लब च्याम्पियन बनेको थियो ।