अखबार नेपाल ट्रेन्डिङ

काठमाडौं: नेपाल प्रिमियर लिग (एनपीएल)को इलिमिनेटरमा आज काठमाण्डु गुर्खाज र लुम्बिनी लायन्स भिड्दै छन् । काठमाण्डुबाट करण केसीको कप्तानीमा मैदानमा उत्रनेछ भने लुम्बिनीबाट राष्ट्रिय टिमका कप्तान रोहितकुमार पौडेलको कप्तानीमा मैदान उत्रनेछ ।

अंक तालिकामा तेस्रो र चौथो स्थानमा रहेका दुई टिमले इलिमिनेटरमा भेट पक्का गरेका हुन् । मङ्गलबार पहिलो क्वालिफायरबाट सुदूरपश्चिम रोयल्स फाइनल प्रवेश गरिसकेको छ । विराटनगर किङ्ग्सलाई ७७ रनले हराउँदै फाइनल प्रवेश गरेको हो । इलिमिनेटरको विजयी टिमले बिहीबार विराटनगरसँग प्रतिस्पर्धा गर्दै फाइनल यात्रा तय गर्नेछ ।

एनपीएल पहिलो सिजनमा लिग चरणबाट बाहिरिएका दुवै टिम यो सिजन इलिमिनेटरबाट उपाधि यात्रामा अगाडि बढ्ने योजनाका साथ मैदानमा उत्रनेछन् । यो सिजन लिग चरणको भेटमा काठमाण्डुसँग २२ रनले पराजित भएको लुम्बिनी इलिमिनेटरमा बदला लिने तयारीका साथ मैदानमा हुनेछ । लिग चरणमा राम्रो प्रदर्शन गर्दै आएको काठमाण्डुले उपाधि जित्ने लक्ष्य लिएको छ ।

लिग चरणका सात प्रतिस्पर्धामा काठमाण्डुले दुई खेल गुमाएको थियो । पाँच खेलमा विजयी भएको काठमाण्डु सुदूरपश्चिम र विराटनगरसँग पराजित भएको टिम हो । लुम्बिनी भने चार खेलमा विजयी हुँदै प्लेअफ पुगेको हो । प्लेअफमा लुम्बिनी चौथो र काठमाण्डु तेस्रो स्थान बनाउँदै इलिमिनेटरमा भेट पक्का गरेका हुन् ।