अखबार नेपाल ट्रेन्डिङ

काठमाडौं: साफ महिला क्लब च्याम्पियनसिप आजदेखि दशरथ रंगशालामा सुरु हुँदैछ । प्रतियोगिता अन्तर्गत आज दुई खेलहरु हुँदैछ । पहिलो खेलमा भुटानको ट्रन्सपोर्टस युनाईटेड लेडिज एफसी र पाकिस्तान कराँची एफसी भिड्दैछन् । यी दुईबीच खेल दिउँसो २ बजे हुनेछ ।

यसैगरी आजै हुने दोस्रो खेलमा बंगलादेश नासरिन स्पोर्ट्स एकाडेमी र नेपाल एपीएफबीच प्रतिष्पर्धा हुँदै । यो खेल साँझ ६ बजे सुरु हुनेछ । दक्षिण एशियाली फुटबलको स्तर बढाउने उद्देश्यले शुरु गरिएको पहिलो संस्करणमा नेपालको च्याम्पियन एपिएफ क्लब, भारतको इस्ट बंगाल एफसी, बंगलादेशको नासरिन स्पोर्टस् एकेडेमी, भूटानको ट्रान्सपोर्ट युनाइटेड र पाकिस्तानको कराची सिटी एफसी गरी कुल पाँच टोलीले चुनौती प्रस्तुत गर्दै छन् ।

यो च्याम्पियनसिपले दक्षिण एशियाली फुटबलमा नयाँ अध्याय थपिँदै छ । प्रतियोगिताको खेलहरू सिंगल राउण्ड रोविनका आधारमा हुनेछ । लिगमा शीर्ष दुई स्थान प्राप्त गर्ने टोलीले उपाधिका लागि भिड्नेछ । च्याम्पियनसिपको विजेताले १० हजार अमेरिकी डलर र उपविजेताले ५ हजार अमेरिकी डलर तथा बाँकी तीन टोलीले समान २ हजार अमरिकी डलर प्राप्त गर्नेछन् ।

सहभागी टिमलाई प्रशिक्षणको लागि च्यासलस्थित च्यासल रंगशाला र भद्रकालीस्थित नेपाली सेनाको खेल मैदानमा व्यवस्था गरिएको छ । एन्फाले प्रतियोगिताको लागि दुई खालको टिकटदर कायम गरेको छ । साधारणतर्फ ३०० र भीआईपीतर्फ ५०० को टिकट मूल्य राखिएको छ । टिकट खल्ती एपमार्फत खरिद गर्न सकिनेछ । प्रतियोगिताको लागि अनुमानित बजेट ३ करोड ७७ लाख ७७ हजार ९० रुपैयाँ रहेको छ ।