अखबार नेपाल ट्रेन्डिङ

काठमाडौं: नेपाली महिला राष्ट्रिय फुटबल टोलीले त्रिदेशीय फुटबल प्रतियोगितामा घरेलु टोली भारतमाथि जित हासिल गरेको छ । भारतको शिलोङस्थित जवाहरलाल नेहरु स्टेडियममा आज भएको खेलमा कप्तान सावित्रा भण्डारी (साम्बा)को दुई गोल मार्फत नेपालले भारतलाई २–१ गोल अन्तरले पराजित गरेको हो ।

सावित्राले खेलको दोस्रो मिनेटमै गोल गरी नेपाललाई पहिलो अग्रता दिलाइन् । विमला विकले मैदानको आफ्नै भागबाट दिएको लामो पासमा सावित्राले भारतीय डिफेण्डरलाई पछि पार्दै गोल गरेकी हुन् । त्यसपछि खेलको ६३औँ मिनेटमा सावित्राले नेपालको लागि दोस्रो गोल गरिन् । तर ८१औँ मिनेटमा करिश्मा सिरभोकरले भारतको लागि एक गोल गरिन् । त्यसपछि खेलमा गोल हुन सकेन र अन्तत नेपाल विजयी भयो ।

यस जितसँगै नेपाल त्रिदेशीय प्रतियोगिताको उपविजेता बनेको छ । नेपालले पहिलो खेलमा इरानसँग ३-० गोल अन्तरको हार व्यहोरेको थियो । पहिलो खेलमा इरानसँग २-० गोल अन्तरले पराजित भएको भारतले कुनै पनि अङ्क जोड्न सकेन ।