अखबार नेपाल ट्रेन्डिङ

काठमाडौं: दुई विदेशसहित नौ टोलीको सहभागिता रहने केपी ओली कप फुटबल प्रतियोगिता आजबाट सातदोबाटोस्थित एन्फा कम्प्लेक्सको मैदानमा सुरु हुँदैछ । उदघाटन खेल एपीएफ र आहा रारा पोखरा गोल्डकपको विजेता उज्वेकिस्तानको ब्ल्याक बुल्स एफसीबिच हुनेछ ।

क्वाटरफाइनलसम्मका खेल सातदोबाटोमा तथा सेमिफाइनल र फाइनल त्रिपुरेश्वरस्थित दशरथ रंगशालामा हुनेछ । फागुन १६ र १७ गते सेमिफाइनल र १९ गते फाइनल हुनेछ । प्रतियोगितामा एपीएफ, ब्ल्याक बुल्स, संकटा क्लब, त्रिभुवन आर्मी फुटबल क्लब, नेपाल पुलिस क्लब, एनआरटी, मच्छिन्द्र फुटबल क्लब, भुटानको ट्रान्सपोर्ट युनाइटेड तथा आयोजकको केपी एफसीले प्रतिस्पर्धा गर्नेछन् ।

प्रतियोगिताको विजेता टोलीले १५ लाख ११ हजार १ सय ११ रुपैंया, दोस्रो टोलीले ५ लाख रुपैयाँ प्राप्त गर्नेछ । प्रतियोगिताका सर्वोत्कृष्ट खेलाडीले १ लाख, उत्कृष्ट गोलरक्षक, उच्च गोलकर्ताले र  उदीयमान खेलाडीलाई समान  ५० हजार रुपैयाँ प्राप्त गर्नेछन् । प्लेयर अफ द म्याचले र १५ हजार रुपैयाँ प्राप्त गर्नेछन् । हरेक खेल विजेता टोलीले  २५ हजार रुपैयाँ प्राप्त गर्ने शनिबार पत्रकार सम्मेलनमा आयोजक नेपाल युवा संघले जनाएको छ ।