अखबार नेपाल ट्रेन्डिङ

काठमाडौं: अन्तर्राष्ट्रिय महिला फुटबल च्याम्पियनसिपमा आज नेपाल र म्यानमारबीच कडा प्रतिष्पर्धा हुँदैछ । यो दुईबीचको खेल नेपाली समय अनुसार साँझ ६ बजे दशरथ रंगशालामा हुनेछ ।

दुवै टोली दुई खेलमा जित निकाल्दै फाइनलमा पुगिसेका छन् । आजको खेल फाइनल नभएपनि फाइनल भिडन्त जस्तै हुने अपेक्षा गरिएको छ । नेपालले कीर्गिस्तान र लेबनानलाई समान एक गोलले हराउँदै उपाधि नजिक पुगेको हो भने म्यानमारले कीर्गिस्तानलाई ५-० र लेबनानलाई ३-१ गोलले पराजित गरेर फाईनल पुगेको हो ।

एएफसी महिला एसियन कप र फिफा विश्वकप लक्षित प्रतियोगिताको उपाधि भिडन्त भने फागुन १४ हुनेछ । ओलम्पिक छनोट अन्तर्गत घरेलु मैदानमै भियतनामसँग खेलेको नेपाली टोली गत वर्ष साउदी अरेबियामा भएको वाफ वुमन्स च्याम्पियनसिपको उपविजेता बनेको थियो । नेपालले पहिलो पटक घरेलु मैदानमै तीन राष्ट्रलाई आमन्त्रण गरेर खेलिरहेको छ ।

म्यानमार अन्तर्राष्ट्रिय महिला च्याम्पियनसिप खेल्नेमध्ये सबैभन्दा उच्च वरीयताको टोली र उपाधिको प्रबल दाबेदार हो । म्यानमार हाल फिफा महिला विश्व वरीयतामा ५५औं स्थानमा छ । म्यानमारले पाँच पटक एएफसी महिला एसियन कप खेलिसकेको छ । म्यानमारले अहिलेसम्म नेपालसँग हार बेहोरेको छैन । नेपालले म्यानमारसँग अहिलेसम्म ३ खेल खेलेको छ । जसमा म्यानमारले २ खेल जित्दा १ खेल बराबरीमा सकिएको छ ।