अखबार नेपाल ट्रेन्डिङ

काठमाडौं: सिद्धार्थ बैंक नेपाल प्रिमियर लिग (एनपिएल) अन्तर्गत आज पहिलो खेलमा लिगको शीर्ष स्थानमा रहेको जनकपुर बोल्ट्स र दोस्रो स्थानमा रहेका सुदूरपश्चिम रोयल्सकोबीचमा खेल हुदैछ ।

पहिलो खेल कीर्तिपुरस्थित टियु मैदानमा बिहान ९ बजे सुरु हुनेछ । जनकपुरले खेलेका सबै ४ खेल नै जितेर प्लेअफको सम्भावना बलियो बनाएको छ । यस खेलमा पनि जित निकालेर लिग चरणको दुई खेल अगावै प्लेअफमा स्थान सुरक्षित गर्ने लक्ष्यमा जनकपुर रहेको छ । जनकपुरले विराटनगर, कर्णाली याक्स, लुम्बिनी र पोखरालाई पराजित गरेको थियो ।

चार खेल खेल्दै ती जित र एक हारका साथ सुदूरपश्चिम दोस्रो स्थानमा छ । यस खेलमा जित निकाल्दै प्लेअफ सम्भावना बलियो बनाउँनुको साथै शीर्ष स्थानमा उक्लिने लक्ष्यमा सुदूरपश्चिम रहेको छ । सुदूरपश्चिमले पहिलो खेलमा विराटनगर, दोस्रोमा काठमाडौं गुर्खाज र तेस्रो खेलमा लुम्बिनीलाई पराजित गरेको थियो । पछिल्लो खेलमा भने चितवन राइनोजसँग पराजित भएको थियो ।

आज हुने दोस्रो खेलमा करण केसीको कप्तानीमा रहेको काठमाडौं गुर्खाजले रोहितकुमार पौडेलको कप्तानीमा रहेको टोली लुम्बिनी लायन्सको सामना गर्दैछ । टियु मैदान कीर्तिपुरमा खेल दिउँसो १ बजे सुरु हुनेछ । पाँच खेलमा चार मा हार र एक मा जित सहित लुम्बिनी अंक तालिकाको पाँचौ स्थानमा छ । मंगलवार भएको पछिल्लो खेलमा चितवन राइनोजमाथि जित हात पारेको लुम्बिनी सोहि लयलाई आज पनि निरन्तरता दिन चाहन्छ । आजको खेलमा पराजित भएमा लिगबाट बाहिरिने लुम्बिनी पहिलो टोली बन्नेछ । लुम्बिनी विराटनगर किंग्स, पोखरा एभेन्जर्स, सुदूरपश्चिम रोयल्स र जनकपुर बोल्ट्ससँग पराजित भएको थियो । भने, मंगलवार भएको पछिल्लो खेलमा चितवनलाई पराजित गरेको थियो ।

तीन खेलमा दुई मा हार र एक मा जितका साथ काठमाडौं तालिकाको छैठौं स्थानमा छ । यस खेलमा जित हात पार्दै काठमाडौं प्लेअफ सम्भावना बलियो बनाउँन चाहान्छ । नेपाल क्रिकेट संघ (क्यान) को आयोजनामा ८ टोलीको सहभागिता रहेको एनपिएल पुस ६ गते सम्म चल्ने छ । राउन्ड रोबिन लिगपछि शीर्ष ४ टोली प्लेअफमा प्रवेश गर्नेछन् ।