अखबार नेपाल ट्रेन्डिङ

काठमाडौं: घरेलु टोली नेपाल एक खेल अगावै साफ यु-२० च्याम्पियनसिपको सेमिफाइनलमा प्रवेश गरेको छ । सातदोबाटोस्थित एन्फा कम्प्लेक्समा आज भएको खेलमा बंगलादेशले श्रीलंकालाई २-० गोल अन्तरले पराजित गरेसँगै नेपालले अन्तिम चारमा आफ्नो स्थान सुरक्षित गरेको हो ।

नेपालले पहिलो खेलमा श्रीलंकालाई १-० पराजित गरेको थियो । श्रीलंका भने समूह ‘ए’ बाट अंकविहीन हुँदै प्रतियोगिताबाट बाहिरियो । नेपालले समूह चरणको अन्तिम खेल बिहीबार बंगलादेशसँग खेल्नेछ । यो खेलको जित्ने टोली नै समूह विजेता हुनेछ, जसले अर्को समूहको उपविजेतासँग खेल्नेछ ।

सातदोबाटोस्थित एन्फा कम्प्लेक्स मैदानमा भएको खेलमा बंगलादेशले दुवै हाफमा १-१ गोल गरेको थियो । खेलको १७औं मिनेमा मिराजुल इस्लामले राबी होसेन राहुलको पासमा गोल गर्दै बंगलादेशलाई अग्रता दिलाएका थिए । दोस्रो हाफमा पिएस अहमाद नोभाले बंगलादेशका लागि दोस्रो गोल गरे । शुक्रबार भुटान र माल्दिभ्सबीच खेल हुनेछ । भुटान पहिलो खेलमा भारतसँग १-० ले पराजित भएको थियो ।