अखबार नेपाल ट्रेन्डिङ

एजेन्सीः श्रीलंका क्रिकेट बोर्ड (एसएलसी)लाई अन्तर्राष्ट्रिय क्रिकेट काउन्सिल आईसीसीले निलम्बन गरेको छ । बोर्डमा सरकारको हस्तक्षेपपछि आईसीसीले तत्काल प्रभावबाट उसको सदस्यता खारेज गरेको हो ।

भारतमा जारी एकदिवसीय विश्वकप क्रिकेटमा श्रीलंकाको प्रदर्शन निकै निराशाजनक रह्यो । टोलीले ९ खेलमा २ मात्रै जित निकालेको थियो । आईसीसीको त्रैमासिक बैठक १८ देखि २१ नोभेम्बरसम्म अहमदाबादमा हुनेछ ।

श्रीलंकाको सरकारले हालै श्रीलंका क्रिकेट बोर्डलाई पूर्ण रूपमा विघटन गरेको छ । यसैलाई ध्यानमा राख्दै आईसीसीका अधिकारीहरूले अनलाइन बैठक गरेर बोर्डलाई निलम्बन गरेका हुन् । आईसीसीले श्रीलंका क्रिकेट बोर्डमा सरकारको अत्यधिक हस्तक्षेप भएको बताएको छ । कुनैपनि आईसीसी सदस्यको काममा सरकारी हस्तक्षेप हुनुहुँदैन । तर पछिल्ला केही दिनदेखि श्रीलंकाको बोर्डले खुलेर काम गर्न नसकेकोले बोर्डलाई तत्काल प्रभावबाट निलम्बन गर्न लागिएको हो ।

भारतसँग पराजित भएपछि खेलकुदमन्त्री रोशन रणसिङ्घेले शुक्रबार एक विज्ञप्ति जारी गर्दै श्रीलंका क्रिकेट बोर्डलाई देशद्रोही र भ्रष्ट भनेका थिए । उनले सञ्चालक समितिका सदस्यहरुको राजीनामा समेत मागेका थिए । त्यसपछि श्रीलंका क्रिकेट सचिव मोहन डी सिल्भाले शनिबार नोभेम्बर ४ मा आफ्नो पदबाट राजीनामा दिएका थिए ।