घरेलु टोली नेपाल पाकिस्तानसँग १-० गोल अन्तरले पराजित
वि.सं.२०८० असोज ४ बिहीवार २०:२५
काठमाडौं: साफ यू-१९ च्याम्पियनसिप अन्तर्गत समूह ‘ए’ को पहिलो खेलमा घरेलु टोली नेपाल पाकिस्तानसँग पराजित भएको छ ।
दशरथ रंगशालामा भएको खेलमा नेपाल पाकिस्तानसँग १-० को गोल अन्तरले पराजित भएको हो । पाकिस्तानी मिडफिल्डर अली जफरले खेलको ७६औं मिनेटमा गरेको उत्कृष्ट गोल नै निर्णायक गोल बन्यो । खेलमा नेपालको प्रदर्शन सोचेजस्तो राम्रो हुन सकेन । नेपालको आक्रामण खेल पुरै समय नै फितलो रह्यो ।
उता पाकिस्तानले भने गोलको धेरै अवसरहरु सृजना गरको थियो । पाकिस्तानले नेपाल भन्दा बढी अवसरहरू सिर्जना गर्दै घरेलु टोली नेपाललाई निरन्तर दबाबमा राखेको थियो । तर नेपालका गोलरक्षक र कप्तान जियारथ शेखले पाकिस्तानलाई गोल गर्नबाट निरन्तर रोकेका थिए ।
खेलको ३३औं मिनेटमा पाकिस्तानले केही सेकेन्डमै दुई ओटा अवसर पायो । मोहम्मद आदिलको प्रहार शेखले बचाएपछि मोहम्मद हरूनले पाएको मौकामा बललाई पोस्ट भन्दा माथि प्रहार गरे । त्यसको एक मिनेट पछि नै आदिलले वान भर्सेस वानको अवसर खेरा फाले । उनको अगाडि गोलकिपर शेख मात्र थिए तर उनको प्रहार पोस्टभन्दा केही टाढाबाट बाहिरियो ।
खेलको ५३औं मिनेटमा नेपालका दीपक थापा मगरको हेडरले पोस्टको दिशा लिन सकेन । ७६औं मिनेटमा पाकिस्तानले खेलमा अग्रता लियो । अलि जफरले लामो दुरीबाट गरेको प्रहारले जियारथ शेखको पहुँचभन्दा टाढा टप कर्नरमा जाली चुमेको थियो । अन्त्यमा त्यही गोल जितका लागि पर्याप्त भयो । नेपालको अर्को खेल माल्दिभ्ससँग सेप्टेम्बर २५ मा हुनेछ । त्यसअघि माल्दिभ्सले सेप्टेम्बर २३ मा पाकिस्तानको सामना गर्ने छ ।
वि.सं.२०८० असोज ४ बिहीवार २०:२५