अखबार नेपाल ट्रेन्डिङ

काठमाडौं: भारतले बंगलादेशलाई ३-० को गोल अन्तरले हराउँदै साफ यू-१९ च्याम्पियनसिपमा विजयी सुरुवात गरेको छ । दशरथ रंगशालामा भएको पहिलो खेलमा भारतको जितमा गुग्मसार गोयारी, नाओबा पंगमबम र अर्जुन सिंह ओइनामले समान एक एक गोल गरे ।

भारतले खेलको पहिलो मिनेट मै अग्रता लिएको थियो । गुग्मसार गोयारीले दाया फ्ल्यान्कबाट आएको क्रसलाई नियन्त्रणमा लिएर सहजै गोल गरेका थिए । खेलको नवौ मिनेटमा बंगलादेश बराबरी गर्नको निकै नजिक पुगेको थियो । मोइनुल इस्लामको बक्स बाहिरबाट लिएको सट भारतका गोलकिपर लियोनेल रिम्मेटले सुन्दर बचाऊ गर्दा बल पोस्टमा लाग्न पुग्यो । ४०औ मिनेटमा राजु अहमदको प्रहार पनि क्रसबारमा लागेर फर्किएको थियो ।

भारतले भने पहिलो हाफको अन्तिम समयमा अर्को गोल थप्यो । नाओबा पंगमबमले बंगलादेशी डिफेन्डरको खुट्टाबाट बल खोसेर सुन्दर फिनिश गर्दा भारत पहिलो हाफमा २-० ले अघि रह्यो । पहिलो गोल खाएपछि सुधरिएको प्रदर्शन गरेको बंगलादेशलाई दोस्रो गोल खाएपछि भने खेलमा स्पष्ट अवसरहरू सृजना गर्न सफल रहे पनि खेलमा फर्किन सकेन ।

भारतले भने खेलको अन्त्यतिर अर्को गोल थप्दै जित सुनिश्चत गर्यो । कप्तान इशान शिशोदियाको पासमा अर्जुन सिंह ओइनामले खेलको ९०औं मिनेटमा तेस्रो गोल गरेका थिए । जितसँगै भारतले समूह बी मा तीन अंक जोड्न सफल भएको छ । समूह बी मा भारत र बंगलादेश बाहेक भुटान रहेको छ ।