अखबार नेपाल ट्रेन्डिङ

एजेन्सी: स्पेनिस ला लिगा फुटबलमा डिफेन्डिङ च्याम्पियन बार्सिलोना विजयी छ । शनिबार राति भएको खेलमा गेटाफेलाई उसैको मैदानमा बार्सिलोनाले २-० गोलअन्तरले पराजित गरेको हो । बार्सिलोनाको जितमा लुइस स्वारेज र जुनियर फिर्पोले गोल गरे । खेलको ४१ औं मिनेटमा स्वारेजले गोल गर्दै बार्सिलोनालाई अग्रता दिलाएका थिए ।

पहिलो हाफमा एक गोलको अग्रता बनाएको बार्सिलोनाले दोस्रो हाफमा एक गोल थप्दा १० खेलाडीमा सीमित पनि बन्यो । खेलको ४९औं मिनेटमा फिर्पोले गोल गर्दै बार्सिलोनालाई २-० गोलको अग्रता दिलाए । तर खेलको ८२ औं मिनेटमा क्लेमेन्ट लेन्ग्लेटले दोहोरो पहेलो कार्डसँगै रातो कार्ड खाँदै मैदानबाट बाहिरिएपछि बार्सिलोना १० खेलाडीमा सीमित बनेको थियो ।

ला लिगा फुटबलमा रियल मड्रिड र एथ्लेटिको मड्रिड भने गोलरहित बराबरी खेल्दै अंक बाँडेका छन् । त्यस्तै, अर्को खेलमा भ्यालेन्सियाले एथ्लेटिको विल्बाओलाई र ग्रानाडाले लेगानेसलाई समान १-० गोलअन्तरले नै पराजित गरेको छ ।