अखबार नेपाल ट्रेन्डिङ

काठमाडौं: विदेशी भूमिमा पनि खेल्न पाउनुपर्ने माग गर्दै क्रिकेटर सन्दीप लामिछानेले सर्वोच्चमा पुनरावेदन गर्ने तयारी गरेका छन् ।

सन्दीपका कानुन व्यवसायी सरोज घिमिरेका अनुसार उच्च अदालत पाटनको आदेशमा धरौटी रकम बढी भएको र विदेशी भूमिमा पनि खेल्न पाउनुपर्ने मागसहित सर्वोच्चमा पुरावेदन गर्न लागिएको हो ।

पाटन उच्च अदालतमा पुनरावेदन गरेपछि उनलाई खेल जीवनबाट बाहिर बस्दा मानसिक समस्या समेत हुनसक्ने भन्दै पासपोर्ट रोक्का राख्ने, उपत्यका बाहिर जानु परे प्रहरीको अनुमति लिनुपर्ने, मिडियामा प्रतिक्रिया दिन नपाउनेसहितका सर्तमा धरौटीमा रिहा गरिएको थियो ।

२० लाख धरौटीमा रिहा भएका सन्दीपलाई क्रिकेट एशोसिएसन अफ नेपाल ‘क्यान’ले राष्ट्रिय टिममा राखेर काठमाडौंमा भएको त्रिकोणत्मक सिरिजमा सहभागी गराएको थियो ।

यसपछि युएइमा हुने खेलमा पनि सहभागी हुन सन्दीपले विदेशी भूमिमा पनि खेल्न पाउनुपर्ने भन्दै सर्वोच्चमा पुरावेदन गरेका हुन् ।

उच्च अदालत पाटनले जिल्ला अदालतको थुनामै राखेर अनुसन्धान गर्ने आदेश उल्ट्याउँदै घर बस्न पाउने आदेश गरेकोमा सन्दीप त्यो फैसलाविरुद्ध पुनः सर्वोच्चमा पुनरावेदन जान लागेका हुन् ।

घिमिरेका अनुसार सम्भवतः सन्दीपको पुरावेदन बुधबार सर्वोच्चमा दर्ता हुनेछ । उच्च अदालत पाटनको आदेशविरुद्ध सरकारी वकिलको कार्यालयले पनि सर्वोच्चमा पुनरावेदन गरेको थियो ।

राष्ट्रिय क्रिकेट टीम यूएई र पपुवान्यूगिनीविरुद्धको म्याच खेल्न आगामी १३ गते दुबई जाँदैछ । अदालतले विदेश जान रोक लगाएकाले उनी राष्ट्रिय टिममा युएइमा हुने म्याचमा रहने छैनन् ।