अखबार नेपाल ट्रेन्डिङ

काठमाडौं: चौंथो संस्करणको ललित स्मृति कप अन्डर एट्टिन च्याम्पियनसिप फुटबलको उपाधि भिडन्तमा आज नेपाल पुलिस क्लब र ब्रिगेड ब्वाईज क्लबबीच प्रतिस्पर्धा हुँदैछ ।

ललितपुरको सातदोबाटास्थित एन्फा कम्प्लेक्सको मैदानमा हुने ललित स्मृति कप यू-१८ च्याम्पियनसिप फुटबलको फाइनलमा एन्फा कम्प्लेक्समा हुने फाईनल खेल नेपाल पुलिस क्लब र ब्रिगेड ब्वाईज क्लब खेल्न लागेका हन् । यी दुईबिचको खेल आज दिउँसो ३ बजे सुरु हुनेछ ।

ब्रिगेड ब्वाईज क्लब यस प्रतियोगिताको साबिक विजेता हो भने पुलिस क्लब पहिलो पटक फाईनल खेल्दैछ । पुलिसले सेमिफाइनलमा जावलाखेल युथ क्लबलाई ३-१ गोल अन्तरले हराएर फाइनल पुगेको हो भने ब्रिगेडले सेमिफाइनलमा मनाङ मर्स्याङ्दी क्लबलाई ७-१ गोल अन्तरले पराजित गरेको थियो । ब्रिगेड लगातार दोस्रो पटक च्याम्पियन बन्न चाहन्छ । पुलिस पहिलो पटक उपाधि जित्ने योजनामा छ ।

ब्रिगेड प्रतियोगितामा अपराजित यात्रा गर्ने एक मात्र टोलि हो । एन्फाका पुर्व उपाध्यक्ष ललितकृष्ण श्रेष्ठको स्मृतिमा अखिल नेपाल फुटबल संघ एन्फाले आयोजना गर्ने प्रतियोगिताको विजेताले ३ लाख रुपैयाँ प्राप्त गर्नेछ । उपविजेताले १ लाख ५० हजार रुपैयाँ पाउनेछ ।