अर्जेन्टिना र अष्ट्रेलियाबीचको खेल आज मध्यराती
वि.सं.२०७९ मंसिर १७ शनिवार ०८:१४
काठमाडौं: कतारमा जारी फिफा विश्वकप फुटबलमा आजबाट नकआउट अर्थात् राउण्ड अफ १६ का खेलहरु सुरु हुँदैछ । आज राउण्ड अफ १६ का दुई खेलहरु हुनेछन् ।
उपाधि दाबेदार अर्जेन्टिना र अष्ट्रेलियाबीच मध्यराती १२:४५ बजे प्रतिस्पर्धा हुनेछ । अर्जेन्टिना अष्ट्रेलियालाई हराएर क्वाटरफाइनलमा पुग्न चाहन्छ । अष्ट्रेलिया पनि अर्जेन्टिनालाई हराउँदै अघि बढ्ने योजनामा रहने छ ।
अर्जेन्टिना समूह ‘सी’ को विजेता बन्दै नकआउट चरणमा पुगेको हो भने अष्ट्रेलिया समूह ‘डी’ को उपविजेता बन्दै नकआउट चरणमा पुगेको हो ।
यस्तै खेलको राउण्ड अफ १६ को पहिलो खेलमा नेदरल्यान्ड्स र अमेरिका भिड्ने छन् । दुई टोलीबीचको खेल नेपाली समय अनुसार राति ८:४५ बजे सुरु हुनेछ । दुबै टोली जित निकाल्दै क्वाटरफाइनलमा स्थान बनाउने योजनामा रहेका छन् ।
नेदरल्यान्ड्स समूह ‘ए’ को विजेता बन्दै नकआउट चरणमा पुगेको हो । अमेरिका भने समूह ‘बी’ को उपविजेता बनेको थियो ।
वि.सं.२०७९ मंसिर १७ शनिवार ०८:१४