अखबार नेपाल ट्रेन्डिङ

काठमाडौं: मेक्सिकोलाई २-० गोल अन्तरले हराउँदै अर्जेन्टिना कतार फिफा विश्वकप फुटबल २०२२ मा सानदर जित निकालेको छ ।

समूह सीको पहिलो खेलमा साउदी अरेबियासँग हारेको अर्जेन्टिनाले दोस्रो खेलमा मेक्सिको विरुद्ध शानदार जित निकालेको हो ।

खेलको ६४औं मिनेटमा एन्जल डि मारियाको पासलाई सदुपयोग गर्दै मेस्सीले अर्जेन्टिनालाई अघि बढाएका थिए । खेल सकिन तीन मिनेट अघि मेस्सीको पासमा फर्नान्डेजले गोल गर्दै जित सुनिश्चित गरे ।

जितसँगै अर्जेन्टिनाले विश्वकपको अघिल्लो चरणको यात्रालाई जिवितै राखेको छ । समूह सीमा अर्जेन्टिना तीन अंक जोड्दै तालिकाको दोस्रो स्थानमा छ ।

तेस्रो स्थानमा रहेको साउदीको समेत समान तीन अंक छ । पोल्याण्ड ४ अंक सहित समूहको शीर्ष स्थानमा छ । एक अंक सहित मेक्सिको पुछारमा छ ।

यसैबीच केलियन एमबाप्पे चम्किएको खेलमा फ्रान्सले डेनमार्कलाई समूह डीको खेलमा २–१ गोल अन्तरले पराजित गरेको छ ।

लगातार दुई खेलमा जित निकाल्दै फ्रान्स प्रतियोगिताको नकआउट चरणमा पुगेको छ । फ्रान्सको जितमा एमबाप्पेले दुवै गोल गरे । खेलका तीन वटै गोल दोस्रो हाफमा सम्भव भएको थियो ।

खेलको ६१औं मिनेटमा हर्नान्डेजको पासमा एमबाप्पले फ्रान्सलाई अघि बढाए । त्यसको पाँच मिनेटमा डेनमार्कका क्रिस्टेन्सनले गोल गर्दै खेल बराबरीमा ल्याएका थिए ।

बराबरीतर्फ उन्मुख खेल सकिन चार मिनेट अघि एन्टोनी ग्रिजम्यानको पासमा एमबाप्पले विजयी गोल गरे । समूह डीको खेलमा शीर्ष स्थानको फ्रान्सले ६ अंक जोडेको छ ।

अष्ट्रेलिया तीन अंक जोडेर दोस्रो स्थानमा छ । डेनमार्क र ट्युनेसिया समान एक अंक सहित क्रमश तेस्रो र चौथो स्थानमा छन् ।