अखबार नेपाल ट्रेन्डिङ

इलाम: पाँचौँ संस्करणको झापा गोल्डकप फुटबलको उपाधि विभागीय टोली त्रिभुवन आर्मी क्लबले जितेको छ  ।

झापा-११ फुटबल क्लबलाई २–१ ले हराउँदै आर्मीले उपाधि जितेको हो ।

पहिलो बाहेक सबै संस्करणमा आर्मी च्याम्पियन बन्दै आएको छ । झापा-११ ले भने पाँचौं पटक पनि उपविजेतामै चित्त बुझाएको छ ।

आर्मीलाई जित दिलाउन टेक बहादुर बुढाथोकी र जर्ज प्रिन्स कार्कीले एक-एक गोल गरे । झापाका विमल घर्तिमगरले एक गोल फर्काए ।

उपाधिसँगै आर्मीले नगद १२ लाख ५५ हजार प्राप्त गरेको छ । उपविजेता बनेको झापाले ६ लाख ५ हजार रुपैयाँ प्राप्त गरेको छ । झापा पाँचौं पटक उपविजेता बनेको हो ।

विशाल ‘ए’ लाई लाइभ टाइभ अचिभमेन्ट अवार्ड

झापा-११ फुटबल क्लबका फरवार्ड विशाल राई ‘ए’ लाइफ टाइम अचिभमेन्ट अवार्डबाट सम्मानित भएका छन् ।

झापा गोल्डकप आयोजक समितिले झापा गोल्डकप फुटबल प्रतियोगिताको फाइनल अघि सोमबार विशाललाई अवार्डबाट सम्मानित गरिएको हो ।

अवार्डबाट सम्मानित हुनुअघि विशाललाई फाइनल खेल्ने दुवै टोलीका खेलाडीले गार्ड अफ अर्नर दिएका थिए ।

झापा-११ टोलीमा अहिले पनि रहेका विशाललाई यामाहा कम्पनीको मोटरसाईकल प्रदान गरिएको थियो ।

विशालले झापा-११ र सिक्किमबीचको खेल यसपटक खेलेका थिए । यसअघि आयोजकले झापा-११ का पूर्वकप्तान प्रवेश कटुवाल र मिडफिल्डर नगेन्द्रमणि लिम्बूलाई पनि लाइफटाइम अचिभमेन्ट अवार्ड प्रदान गरिसकेको छ ।