अखबार नेपाल ट्रेन्डिङ

काठमाडौं: सहिद स्मारक ‘ए’ डिभिजन लिग फुटबल अन्तर्गत अन्तिम चरणका तीन खेलसँगै आजबाट लिग सकिदैछ ।

जसमा दशरथ रंगशालामा दुई तथा एन्फा कम्प्लेक्समा एक खेल हुनेछन् ।

लिगको उपाधि विजेता र रेलिगेसनमा पर्ने टोलीको टुंगो यस अघि नै लागिसकेको छ ।

उपाधि भने मछिन्द्र फुटबल क्लबले जितिसकेको छ भने च्यासल युथ क्लब र ब्रिगेड ब्वाइज क्लब रेलिगेसनमा परेका छन् ।

त्रिपुरेश्वरस्थित दशरथ रंगशालामा हुने पहिलो खेलमा त्रिभुवन आर्मी क्लब र मनाङ मर्स्याङ्दी क्लबबीच प्रतिस्पर्धा हुनेछ । यी दुईबीचको खेल दिउँसो १ बजे सुरु हुनेछ ।

आर्मी १२ खेलमा २२ अंक जोडेर दोस्रो स्थानमा छ भने मनाङ १२ खेलमा २० अंक जोडेर पाँचौं स्थानमा छ ।

यस्तै रंगशालामा हुने दोस्रो खेलमा च्याम्पियन मछिन्द्र र एपीएफ क्लबबीच प्रतिस्पर्धा हुनेछ । यी दुईबीचको खेल ४:३० बजे सुरु हुनेछ ।

मछिन्द्र १२ खेलमा ३२ अंक जोडेर शीर्ष स्थानमा छ भने एपीएफ १५ अंक जोडेर आठौं स्थानमा छ ।

सातदोबाटोस्थित एन्फा कम्प्लेक्समा हुने खेलमा न्युरोड टिम एनआरटी र नेपाल पुलिस क्लबबीच प्रतिस्पर्धा हुनेछ । यी दुईबीचको खेल दिउँसो १ बजे सुरु हुनेछ ।

एनआरटी २० अंक जोडेर चौंथो स्थानमा छ भने पुलिस १२ अंक जोडेर ११ औं स्थानमा छ ।