अखबार नेपाल ट्रेन्डिङ

एजेन्सीः ब्राजिलियन क्लब पाल्मिरस अतिरिक्त समयमा २-१ गोल अन्तरले हराउँदै इंग्लिस क्लब चेल्सीले फिफा क्लब विश्वकप फुटबलको उपाधि जितेको छ ।

गएराति भएको फाइनल खेलमा ब्राजिलियन क्लब पाल्मिरसलाई अतिरिक्त समयमा हराउँदै चेल्सी च्याम्पियन बनेको हो ।

चेल्सीलाई उपाधि दिलाउन रोमेलु लुकाकु र काइ हाभर्ट्जले एक-एक गोल गरे ।

पाल्मिरसका लागि राफेल भेइगाले एक गोल फर्काए ।

निकै नै रोमान्चक बनेको खेलको ५४औं मिनेटमा रोमेलु लुकाकुले हेड मार्फत गोल गर्दै चेल्सीलाई सुरुआती अग्रता दिलाएका थिए ।

तर, खेलको ६४ औं मिनेटमा राफेल भेइगाले पेनाल्टीमा गोल गर्दै पाल्मिरसलाई १-१ गोलको बराबरीमा फर्काए ।

त्यसपछि निर्धारित ९० मिनेटको खेल १-१ गोलको बराबरी भएपछि खेल अतिरिक्त समयमा गएको थियो ।

अतिरिक्त समयमा चेल्सीका हाभर्ट्जले पेनाल्टीमा निर्णायक गोल गरे ।

उनले ११७ औं मिनेटमा गोल गर्दै चेल्सीलाई २-१ को जित दिलाए ।

यसैबी अतिरिक्त समयको इन्जुरी समयमा ग्रासियाले रातो कार्ड पाएपछि ब्राजिलियन क्लब १० खेलाडीमा समेटिएको थियो ।

चेल्सीले पहिलो पटक क्लब विश्वकपको उपाधि जितेको हो ।