अखबार नेपाल ट्रेन्डिङ

काठमाडौं: नेपाली राष्ट्रिय फुटबल टिमले पहिलो मैत्रीपूर्ण खेलमा अफ्रिकी राष्ट्र मरिससलाई १-० गोल अन्तरले पराजित गरेको छ ।

त्रिपुरेश्वरस्थित दशरथ रंगशालामा शनिबार भएको पहिलो मैत्रीपूर्णमा खेलमा नेपालले जित दिलाउन विमल घर्तिमगरले निर्णायक गोल गरे ।

एक वर्षपछि टिममा पुनरागमन गरेका विमलले खेलको ५५औं मिनेटमा निर्णायक गोल गरेका हुन् ।

अन्जन विष्टको लामो पासमा पेनाल्टी क्षेत्रको ठिक बाहिरबाट विमलले प्रहार गरेको बलले पोस्टमा लाग्दै जाली चुमेको थियो ।

नेपाल मरिससविरुद्ध सुरुआतबाटै आक्रामक रुपमा प्रस्तुत भएको थियो ।

नेपालले पहिलो पटक आधिकारिक रुपमा अफ्रिकी राष्ट्रसँग खेलेको हो ।

नेपालले अब मरिससविरुद्धको दोस्रो मैत्रीपूर्ण मंगलबार खेल्नेछ ।