अखबार नेपाल ट्रेन्डिङ

काठमाडौं: पोखरामा जारी २०औं संस्करणको आहा रारा गोल्डकपको उपाधि विभागीय टोली नेपाल एपिएफ फुटबल क्लबले जितेको छ ।

पोखरा रंगशालामा भएको उपाधि भिडन्तमा मनाङ मर्स्याङ्दी क्लबलाई टाइब्रेकरमा ५–४ ले पराजित गर्दै एपिएफ पहिलोपटक आहा राराको च्याम्पियन बनेको हो ।

निर्धारित र अतिरिक्त समयको खेल २–२ गोलको बराबरीमा सकिएपछि निर्णय टाईब्रेकरका आधारमा गरिएको थियो ।

उपाधि सहित एपीएफले १० लाख रुपैयाँ हात पारेको छ ।

उपविजेता मनाङले ५ लाख रुपैयाँमा चित्त बुझाएको छ ।

खेलको २० औं मिनेटमा युवराज खड्काले विभागीय टिम एपीएफलाई अग्रता दिलाएका थिए ।

दोस्रो हाफको ६७औं मिनेटमा दयानन्द सिंहले मनाङका लागि बराबरी गोल फर्काए ।

कप्तान बिमल रानाको क्रसलाई सदुपयोग गर्दै सिंहले गोल गरेका थिए ।

खेल सकिन ६ मिनेट अघि फ्रेङ्कलिन टालाले मनाङका लागि गोल गर्दै जिततर्फ अग्रसर गराएका थिए ।

तर खेलको इन्जुरी समयको पहिलो मिनेटमै एपीएफका रबि थिङले हेडमार्फत गोल गर्दै खेललाई अतिरिक्त समयतर्फ धकेलेका थिए ।

प्रतियोगितालाई पहिलो संस्करणदेखि नै हिमश्री फुड्स प्रा.लि.को उत्पादन आहा रारा तयारी चाउचाउले प्रायोजन गर्दै आइरहेको छ ।