अखबार नेपाल ट्रेन्डिङ

काठमाडौं: ‘ए’ डिभिजन लिग च्याम्पियन मछिन्द्र फुटबल क्लबलाई हराउँदै विभागीय नेपाल एपिएफ फुटबल क्लब २०औं संस्करणको आहा रारा गोल्डकपको फाइनलमा प्रवेश गरेको छ ।

पोखरा रंगशालामा बुधबार भएको पहिलो सेमिफाइनलमा १० खेलाडीमा सिमित मछिन्द्र फुटबल क्लबलाई ३-१ गोल अन्तरले हराउँदै एपीएफ फाईनलमा पुगेको हो ।

एपीएफलाई जित दिलाउन सनिश श्रेष्ठ, प्रदिप लामा र नविन लामाले एक एक गोल गरे ।

मछिन्द्रका ओमोलाजा करिमले एक गोल फर्काए ।

खेलको २५औं मिनेटमा सनिशले गोल गर्दै एपीएफलाई सुरुआती अग्रता दिलाएका थिए ।

तर, खेलको ४०औं मिनेटमा ओमोलाजाले गोल गर्दै मछिन्द्रलाई १-१ को बराबरीमा ल्याएका थिए ।

खेलको ६९औं मिनेटमा प्रदिपले गोल गर्दै एपीएफलाई २-१ को अग्रता दिलाए ।

यस्तै खेलको ७१औं मिनेटमा करिमले दोहोरो पहेलो कार्डसहित रातो कार्ड पाउँदा मछिन्द्र १० खेलाडीमा समेटिएको थियो ।

खेलको अतिरिक्त समयमा कप्तान नविनले गोल गर्दै एपीएफलाई ३-१ को सहज जित दिलाए ।

एपीएफ १४ वर्षपछि आहा राराको फाइनल पुगेको हो ।

यस अघि २०६४ मा एपीएफले फाइनल खेलेको थियो ।

अब एपीएफले फाइनलमा मनाङ मर्स्याङ्दी क्लब र त्रिभुवन आर्मी क्लबबीचको विजेतासँग प्रतिस्पर्धा गर्नेछ ।