अखबार नेपाल ट्रेन्डिङ

एजेन्सी: ईंग्लिस क्लब चेल्सीले युरोपा लिग फुटबलको उपाधि जितेको छ । बुधबार राती भएको फाइनलमा आर्सनललाई ४-१ गोल अन्तरले पराजित गर्दै चेल्सी च्याम्पियन बनेको हो । अजरबैजानमा भएको फाइनलमा चेल्सीलाई उपाधि दिलाउन इडेन हजार्डले २ गोल गरे ।

७ वर्ष चेल्सीमा बिताएका हजार्डले सिजनको अन्त्यसँगै क्लब छाड्दै छन् । यस्तै ओलिभर जेरुड र पेड्रो रोड्रीगेजले एक एक गोल गरे । आर्सनलका एलेक्स इओबीले एक गोल फर्काए । बाकी ओलम्पिक स्टेडियममा पहिलो हाफ गोलरहित बराबरीमा सकिएको खेलको दोस्रो हाफमा चेल्सीले ४ गोल गर्दै उपाधि चुमेको हो ।

खेलको ४९ औं मिनेटमा जेरुडको गोलबाट चेल्सीले सुरुवाती अग्रता बनाएको थियो । जितसँगै चेल्सीले तेस्रो पटक युरोपा लिगको उपाधि हात पारेको छ । क्लब फुटबलको दोस्रो प्रतिष्ठित प्रतियोगिता मानिने युरोपा लिगमा यसअघि चेल्सीले सन् २०१२ र १३ को सिजन जितेको थियो ।