अखबार नेपाल ट्रेन्डिङ

एजेन्सी: प्रधानमन्त्री बेन्यामिन नेतन्याहूले गठबन्धन सरकार बनाउन असफल भएपछि इजरायली सांसदहरुले संसद भंग गर्ने पक्षमा मतदान गरेका छन् । यो फैसलासँगै अब इजरायलमा आगामी सेप्टेम्बरमा पुनः निर्वाचन हुने भएको छ ।

प्रधानमन्त्री नेतन्याहूले पछिल्लो महिना भएको निर्वाचनपछि नयाँ दक्षिणपन्थी गठबन्धन बनाउनका लागि गरेको प्रयास विफल भएको छ । कार्यवहाक प्रधानमन्त्रीले गठबन्धन बनाउन नसकेको इजरालयको इतिहासमा यो पहिलो घटना हो । गठबन्धन बन्न नसक्ने गतिरोधको केन्द्रमा अति-धर्मनिष्ठ यहूदी शिक्षण संस्थानका विद्यार्थीहरुलाई अनिवार्य सैनिक सेवामा मिल्ने छूटको समीक्षा गर्न माग सांसदहरुले गरिरहेका थिए ।

गठबन्धन बनाउनका लागि समय सीमा पूरा भएपछि पेश गरिएको संसद भंग गर्ने प्रस्तावको पक्षमा ७४ मत पर्यो भने विपक्षमा ४५ सांसद उभिएका थिए । गत अप्रिलमा भएको निर्वाचनमा एक सय २० स्थान मध्ये नेतन्याहूको लिकुड पार्टीले ३५ सिटमा जित हासिल गरेको थियो । नेतन्याहूले पाँचौ पटक प्रधानमन्त्रीको पद सम्हाल्ने मौका पाएका थिए तर उनले पूर्व रक्षामन्त्री एविग्दोर लिबरमनसँग सम्झौता गर्न सकेनन् । लिबरमनसँगको सम्झौताविना सरकार बनाउन सम्भव थिएन । संसदमा भएको मतदान पछि पत्रकारहरुसँग कुरा गर्दै प्रधानमन्त्री नेतन्याहूले आफुले स्पष्ट चुनावी अभियान चलाएर विजय हाँसिल गर्ने दाबी गरेका छन् ।