अखबार नेपाल ट्रेन्डिङ

एजेन्सी: आईसीसी एक दिवसीय विश्वकप क्रिकेट अघिको अभ्यास खेलमा भारतले बंगलादेशलाई पराजित गरेको छ । कार्डिफमा हिजो भएको खेलमा भारतले बंगलादेशलाई ९५ रनले हराएको हो ।

भारतले दिएको ३ सय ६० रनको लक्ष्य पछ्याएको बंगलादेशले ४९ ओभर ३ बलमा अलआउट हुँदै २ सय ६४ रन मात्र बनाउन सक्यो । बंगलादेशका लागि मुस्फिकुर रहिमले ९० तथा लिटोन दासले ७३ रनको अर्धशतकीय इनिङ्स खेलेपनि टोलीलाई जित दिलाउन सकेनन् । भारतका लागि कुलदिप यादब र युजभेन्द्र चाहलले ३/३ विकेट लिए । जस्प्रित बुम्राहले २ विकेट लिए ।

टस हारेर पहिले ब्याटिङ गरेको भारतले ५० ओभरमा ७ विकेट गुमाएर ३ सय ५९ रन बनाएको थियो । भारतका लागि महेन्द्र सिंह धोनी र लोकेश राहुलले शतकीय इनिङ्स खेले । धोनीले एक सय १३ रन जोड्दा राहुलले एक सय ८ रन बनाए । कप्तान विराट कोहली ४७ रनमा आउट भए । बंगलादेशका रुबेल हुसेन र शाकिब अल हसनले २/२ विकेट लिए । इंग्ल्याण्ड र वेल्समा हुने विश्वकपको तयारीका लागि दुवै राष्ट्रले अभ्यास खेलेका हुन् । विश्वकप क्रिकेट मे ३० बाट सुरु हुनेछ ।