अखबार नेपाल ट्रेन्डिङ

काठमाडौं: प्रधानमन्त्रीकप एक दिवसीय क्रिकेट प्रतियोगिता अन्तर्गत आज दुई खेल हुनेछ । किर्तिपुर क्रिकेट मैदानमा प्रदेश-३ र गण्डकी प्रदेश भिडेछन् भने मुलपानी क्रिकेट मैदानमा आर्मी र कर्णली प्रदेश खेल्नेछन् ।

प्रतियोगिता अन्तर्गत हिजो भएको खेलमा एपीएफले लगातार दोस्रो जित निकालेको छ भने प्रदेश-३ ले पहिलो जित दर्ता गरेको छ । सशस्त्र प्रहरी बलको एपीएफले सूदूपश्चिम प्रदेशलाई तिन विकेटले पराजित गरेको हो । सूदूपश्चिम प्रदेशले प्रस्तुत गरेको एक सय २६ रनको लक्ष्य एपिएफले ३५औं ओभरमा ७ विकेट गुमाएर भेट्टायो ।

टस जितेर पहिले ब्याटिङ गर्दै सूदूपश्चिम प्रदेश ३८औं ओभरमा अलआउट हुँदै जम्मा एक सय २५ रनमा समेटिन पुग्यो । सूदूपश्चिमको सम्पूर्ण टोली झिनो योगफलमा समेटिने क्रममा खेलाडीबीच तालमेल नपुग्दा ५ जना ब्याट्सम्यान रनआउट बन्न पुगका थिए । एपीएफले यसअघि पहिलो खेलमा प्रदेश-३ लाई हराउँदै जित निकालिसकेको छ ।

हिजै भएको मुलपानी किक्रेट मैदानमा भएको खेलमा प्रदेश-५ लाई हराउँदै प्रदेश-३ ले प्रतियोगितामा पहिलो जित हात पारेको छ । प्रदेश-३ ले प्रदेश-५ माथि ६ विकेटको जित निकालेको हो । प्रदेश-५ ले दिएको एक सय २३ रनको झिनो लक्ष्यलाई प्रदेश ३ ले २२औं ओभरमा ४ विकेट गुमाएर पुरा गर्यो ।

टस हारेर ब्याटिङ गरेको प्रदेश-५ बयालिसौं ओभरमा अलआउट हुँदै जम्मा एक सय २२ रनमा समेटिएको थियो । प्रदेश-५ लाई झिनो योगफलमा रोक्नेक्रममा प्रदेश ३ का कप्तान पारस खड्काले १० आभेरमा २४ रन मात्र खर्चेर ४ विकेट लिए भने सूर्य तामाङले जम्मा १६ रन दिँदै ३ विकेट हात पारे ।