अखबार नेपाल ट्रेन्डिङ

काठमाडौं: आईसीसी महिला टी-ट्वान्टी विश्वकप एसिया छनोटको अन्तिम खेलमा आज नेपालले आयोजक राष्ट्र युएईविरुद्ध प्रतिस्पर्धा गर्दैछ ।

नेपाल र युएईबीचको खेल दुबईको आईसीसी एकेडेमी मैदानमा हुनेछ ।

खेल बिहान ११:१५ बजे सुरु हुनेछ ।

नेपालले ग्लोबल छनोटमा स्थान बनाउन युएईविरुद्ध जित मात्र हात पारेर हुँदैन नेट रनरेटमा समेत भर पर्नुपर्ने हुन्छ ।

प्रतियोगिता अन्तर्गत ६ टिम सहभागी छन् र केवल एक टिम ग्लोबल छनोटका लागि स्थान सुरक्षित गर्नेछ ।

अहिलेको अवस्थामा सहभागी सबै ६ टिमले चार–चार खेल खेलिसकेका छन् र केवल एक खेल खेल्न बाँकी छ ।

अंक तालिका अनुसार लगातार चार खेल जित्दै युएई ८ अंक सहित शीर्ष स्थानमा छ र उसले नेपालविरुद्ध खेल्नुपर्नेछ ।

यता नेपाल र हङकङले चारमध्ये तीन–तीन खेल जित्दै समान ६–६ अंक जोडेपनि नेट रनरेटमा भने नेपाल अगाडि छ ।

ग्लोबल छनोटको सम्भावना कायमै राखेको हङकङले अन्तिम खेल आज नै कुवेत विरुद्ध खेल्नेछ ।

मलेसिया २ अंक, भुटान २ अंक र अंकको खाता खोल्न नसकेको कुवेत ग्लोबल छनोटबाट बाहिरिसकेको छ ।