अखबार नेपाल ट्रेन्डिङ

एजेन्सी: डच लिगको उपाधि आयाक्सले जितेको छ । पाँच वर्षपछि नेदरल्यान्डको शीर्ष डिभिजनको लिग च्याम्पियन बन्ने क्रममा आयाक्सले गएराति भएको लिग चरणको अन्तिम खेलमा डी ग्राफ्सचापलाई ४-१ गोल अन्तरले हराउँदै आयाक्ले सन् २०१४ पछाडी पहिलो पटक लिग उपाधि उचालेको हो ।

च्याम्पियन्स लिगको सेमिफाइनलसम्म पुगेको आयाक्सले यो सिजन घरलु प्रतियोगिताको दुई उपाधि जितेको छ । यसले लिग कपको उपाधि पनि जितेको थियो । आयाक्सले सन् २०१४ देखि लिग जित्न सकेको थिएन । ग्राफ्स्च्यापको मैदानमा भएको खेलमा लास्से स्कोनेले ३७औं मिनेटमा गोल गर्दै आयाक्सलाई अग्रता दिलाएका थिए । ४०औं मिनेटमा ग्राफ्स्च्यापका एल जेबीले गोल गरेपछि खेल बराबरीमा पुग्यो । त्यसको चार मिनेटपछि आयाक्सका लागि निकोलस टाग्लियाफिकोले गोल गर्दै फेरी आयाक्सलाई अग्रता दिलाए । ६७औं मिनेटमा आयाक्सले पेनाल्टी पायो । जसलाई डुसान टाडिचले गोलमा परिणत गरे । ८७औं मिनेटमा टाडिचले अर्को गोल गरेपछि आयाक्सले दोस्रो स्थानको पीएसभीलाई पछि पार्दै उपाधि जित्यो । लिग विजेता आयाकसले ३४ खेलबाट ८६ अंक जोड्न सफल रह्यो । उपविजेता बनेको पीएसभीले ८३ अंक प्राप्त गर्यो ।