अखबार नेपाल ट्रेन्डिङ

काठमाडौः सहारा क्लब पोखराको आयोजनामा १९ औं संस्करणको आहा रारा गोल्डकप चैत तेस्रो सातादेखि पोखरा रंगशालामा शुरू हुने भएको छ ।

आयोजकले शनिवार पत्रकार सम्मेलन गरी चैत १७ देखि २८ गतेसम्म पोखरा रंगशालामा आहा रारा गोल्डकप प्रतियोगिता सञ्चालन गर्ने जनाएको हो ।

प्रतियोगितामा १२ टीमको प्रतिस्पर्धा हुने क्लब अध्यक्ष केशवबहादुर थापाले जानकारी दिए ।

उनका अनुसार क्लबले कोभिड–१९ बीच पनि विदेशी, स्वदेशी ‘ए’ डिभिजनका क्लब तथा मोफसलका गरी १२ टीमको सहभागिता गराउने प्रयास छ ।

‘खेलकुदको विकासमा सहकार्य गरौं पोखरालाई खेलकुद पर्यटन शहरको रूपमा स्थापित गरौं’ मूलमन्त्रका साथ क्लबले फूटबलमार्फत सामाजिक सेवा गर्ने उद्देश्यले झण्डै २ दशकदेखि नियमित रूपमा प्रतियोगितालाई निरन्तरता दिँदै आएको छ ।

प्रतियोगिताको कूल अनुमानित आम्दानी १ करोड ३० लाख १ हजार रुपैयाँ र खर्च १ करोड १ लाख ८१ हजार रुपैयाँ अनुमान गरिएको छ ।

बचत रकम क्लबबाट सञ्चालित सहारा फूटबल एकेडेमीमा खर्च गरिने छ । हाल तेस्रो व्याचको एकेडेमीमा १४ जिल्लाका २४ जना बालकहरू आश्रित छन् ।

२०६१ सालदेखि आवासीय रूपमा निःशुल्क स्वास्थ्य, शिक्षादीक्षा लगायत उनीहरूलाई फूटबल प्रशिक्षण समेत सहारा फूटबल एकेडेमी गण्डकी प्रदेश, पोखरा—१७, दोविल्लामा प्रदान गर्दै आएको छ ।

हिमश्री फूड्स प्रालिको मुख्य प्रायोजनमा हुँदै आएको प्रतियोगितामा गत वर्षको विजेता मनाङ्ग मस्र्याङ्दी क्लब र उपविजेता नेपाल पुलिस क्लब हो ।

पत्रकार सम्मेलनमा राखेप सदस्य राजेश गुरुङले प्रतियोगिता सफलताको शुभकामना व्यक्त गर्दै पोखरा रंगशालामा २० हजार दर्शक अट्ने गरी काम शुरू गरिने बताए ।

उनका अनुसार पोखराको पर्यटनलाई खेल क्षेत्रबाट समेत दीगो बनाउन रंगशालामा ‘फ्लड लाइट’को व्यवस्था अपरिहार्य रहेकाले राखेप यसबारे काम अघि बढाउने तयारीमा छ ।

सहारा युकेका महासचिव धनु थकालीले प्रतियोगिता सफल बनाउन सहारा युकेको तर्फबाट पूर्ण सहयोग रहने प्रतिबद्धता जनाउँदै प्रतियोगितामा वितरण गरिने पदकहरू युकेबाट ल्याउने गरी पहल गरिने बताए ।

यो पनि पढ्नु होस्