अखबार नेपाल ट्रेन्डिङ

काठमाडौं: नेपाली राष्ट्रिय फुटबल टिमले आज दोस्रो अन्तराष्ट्रिय मैत्रीपूर्ण खेलमा बंगलादेशसँग प्रतिस्पर्धा गर्दैछ ।

नेपालले ढाकास्थित बंगबन्धु रंगशालामा बंगलादेशसँग प्रतिस्पर्धा गर्नेछ ।

नेपाल र बंगलादेशबीचको खेल नेपाली अनुसार अपरान्ह ४:४५ बजे सुरु हुनेछ ।

‘मुजिब वर्ष फिफा अन्तराष्ट्रिय फुटबल सिरिज’ अन्तर्गत पहिलो खेलमा पराजित नेपालले दोस्रो खेलमा बंगालदेशसंग खेल्न लागेको हो ।

दोस्रो खेलमा नेपालले जित निकाले सिरिजको ट्रफीका लागि ट्राइवेकर गर्ने आयोजक बंगलादेशले यसअघि नै निर्णय गरेको छ ।

यसअघि भएको पहिलो खेलमा नेपाल पराजित भएको थियो । शुक्रबार बंगबन्धु रंगशालामा निकै फितलो प्रदर्शन गरेको नेपाल २–० ले स्तव्ध हुनुपरेको थियो ।

त्यसैले आजको खेलमा जित निकाल्दै नेपाल मैत्रीपूर्ण सिरिजको सुखद बिदाई र बंगलादेशसंग बदलाको खोजिमा हुनेछ ।

पहिलो खेलमा ३ नयाँ खेलाडीलाई डेब्यू दिएको नेपालले दोस्रो खेलमा केही अनुभवी खेलाडीलाई मैदान उतार्ने सम्भावना छ ।

अघिल्लो खेलमा डेब्यू गरेका विकास खवासले यो खेलमा पनि प्लेयिङ ११ मा स्थान बनाउने सम्भावना छ भने एरिक विष्ट र दर्शन गुरुङले समेत स्थान बनाउने सम्भावना छ ।

पहिलो खेल नखेलेका रजिन धिमाल आजको खेलमा उपस्थित हुनेछन् ।

कोरोना पोजेटिभ देखिएपछि धिमालले अघिल्लो खेल गुमाएका थिए ।

यस्तै पहिलो खेलमा चोट बोकेका मिडफिल्डर बिक्रम लामाको सम्भावनाबारे बंगलादेशबाट कुनै प्रतिक्रिया आएको छैन ।

अघिल्लो खेलमा बिक्रमले चोट बोकेपछि उनको स्थानमा एरिक बिस्टले डेब्यूको मौका पाएका थिए ।

यस्तै अघिल्लो खेलमा सुरुवाती ११ मा पर्न नसकेका भरत खवासले यो खेलमा पहिलो रोजाइमा स्थान बनाउने स्रम्भावना छ ।

बंगलादेश पनि नेपालविरुद्ध जित निकाल्दै मुजिब वर्ष सिरिज हात पार्न चाहान्छ । बंगलादेशलाई कम्तिमा बराबरीको नतिजाले पनि ट्रफी दिलाउने छ ।