अखबार नेपाल ट्रेन्डिङ

एजेन्सी: प्रिमियर लिग फुटबलमा आज चार खेलहरु हुँदैछ ।

शिर्ष क्लब चेल्सी, म्यान्चेस्टर युनाईटेड, एभर्टन, साउथह्याम्पटन लगायतले प्रतिस्पर्धा गर्नेछन् ।

यो सिजन खेलाडी ट्रान्सफरमा महंगो रकम खर्चिएको चेल्सीले वेस्ट ब्रोमको सामना गर्दैछ । अघिल्लो सिजन शिर्ष चारमा रहँदै लिग सकेको चेल्सीले दोस्रो डिभिजनबाट बढुवा भएको वेस्टब्रोमको सामना गर्न लागेको हो ।

चेल्सीले यो खेलमा आफ्ना महत्वपूर्ण र नयाँ केही खेलाडीलाई डेब्यु दिने सम्भावना छ । विन चिलवेल, हाकिम जियाच, थिएगो सिल्भाले यो खेलमा स्थान बनाउने अनुमान गरिएको छ । यस अघि चेल्सीले पहिलो खेलमा ब्राइटनलाई ३–१ ले हराउँदै विजयी सुरुवात गरेको थियो ।

घरेलु टोली वेस्टब्रोम लिगमा पहिलो जितको खोजीमा हुनेछ । लिग अन्तर्गत आज नै हुने अन्य खेलमा म्यान्चेस्टर युनाइटेड र ब्राइटन, एभर्टन र क्रिस्टल प्यालेस तथा साउथह्याम्पटन र वर्नली खेल्नेछन् ।