अखबार नेपाल ट्रेन्डिङ

एजेन्सीः इटालियन सिरी ए फुटबलमा बेलोग्नामाथि युभेन्ट्सले २–० गोल अन्तरले सहज जित निकालेको छ । पछिल्लो ८ सिजनको लिग च्याम्पियन युभेन्ट्सले दोस्रो स्थानको लाजियोसंग ४ अंकको अग्रता समेत लिएको छ ।

खेलमा रोनाल्डोले २३औं मिनेटमा पेनाल्टीमा गोल गर्दै युभेन्ट्सलाई सुरुवाती अग्रता दिलाएका थिए । म्याथिज डी लिटलाई स्टेफानो डेन्सविलले फल गरेपछि युभेन्ट्सले पेनाल्टीको अवसर पाएको थियो । पाउलो ड्याबालाले ३६औं मिनेटमा गोल गर्दै युभेन्ट्सको जित सुनिश्चित गरेका थिए ।

दोस्रो हाफको ईन्जुरी समयमा ड्यानिलोले रातो कार्ड खादै मैदान छाडेपछि युभेन्ट्सले १० खेलाडीमा रहेर खेलको अन्त्य गरेको थियो । ईटालीको फुटबल सुरु भएपछि युभेन्ट्सले दुई खेलमा गोल गर्न सकेको थिएन । कोपा ईटालियामा युभेन्ट्सले एसी मिलानसँग सेमिफाईनलको दोस्रो लेगमा गोल रहित बराबरी खेलेको थियो ।

फाईनल खेलमा समेत नापोलीसँग निर्धारित समयमा कुनै गोल गर्न सकेन । पेनाल्टी सुटआउटमा पराजित भएपछि उसले कोपा ईटालियाको उपाधि समेत गुमाएको थियो । युभेन्ट्स ६६ अंक सहित शीर्ष स्थानमा छ । एक खेल कम खेलेको लाजियोको ६२ अंक छ । बेलोग्ना ३४ अंक सहित १० औं स्थानमा यथावत छ ।