अखबार नेपाल ट्रेन्डिङ

एजेन्सीः विश्व फुटबलको सर्वोच्च निकाय फिफा कंग्रेसको बैठक सेप्टेम्बर १८ मा बस्ने टुङ्गो लागेको छ । महामारीको रुपमा फैलिएको कोरोना भाईरसका कारण जुन ५ मा निर्धारण गरिएको फिफा कंग्रेस तीन महिना पछाडी सारिएको थियो ।

फिफाले ७०औं कंग्रेस बैठक जुन ५ बाट सारेर सेप्टेम्बर १८ मा लगेको थियो । बैठक ईथोपियाको अदीस अबाबामा बस्ने पक्का गरिएको थियो । कोरोनाका कारण बिग्रदो स्वास्थ्य अवस्था र ह्वाई उडानमा अधिकांश देशले लगाएको प्रतिबन्धले बैठक सार्नु परेको फिफाले जनाएको थियो । तर फिफाले अब सेप्टेम्बर १८ को निर्धारण गरेको मितिमै फिफा कंग्रेस बैठकको आयोजना गर्ने पक्का गरेको छ ।

फिफाले आफ्ना बार्षिक कार्यक्रम पारित गर्नुपर्ने भएकाले सेप्टेम्बर १८ मै बैठक आयोजना गर्ने भएको हो । सामाजिक दुरी कायम गर्नुपर्ने भएकाले फिफाले भिडियो कन्फ्रेन्समार्फत साधारण सभा आयोजनाको तयारी गरेको छ । सम्बन्धित देशका प्रतिनिधि भिडियो कन्फ्रेन्समार्फत फिफा कंग्रेस बैठकमा जोडिनेछन् ।

बैठकले फिफाको बार्षिक कार्यक्रम पारित गर्नुका साथै बजेट, निलम्बन, नयाँ सदस्यता लगायतका विविधि बिषयमा निर्णय गर्नेछ । कोरोनाकै महामारीका कारण फिफाले आफ्ना अधिकांश फुटबल कार्यक्रम स्थगित गरेको छ । फिफाले युरोकपदेखि विभिन्न उमेर समुहका विश्वकपको मिति तत्काललाई स्थगित गरेको जनाएको छ ।