अखबार नेपाल ट्रेन्डिङ

एजेन्सीः अमेरिकाको राष्ट्रिय महिला फुटबल टिमले समान तलबको मागसहित दर्ता गराएको मुद्दा खारेजको फैसलाविरुद्ध अपील गरेको छ । पुरुष खेलाडी समान तलब पाउनुपर्ने मागसहित महिला टिमले दर्ता गरेको मुद्दा गत साता अमेरिकाको जिल्ला अदालतले खारेज गरेको थियो ।

महिला टिमका प्रवक्ता मोली लेभिनसनले मुद्दा खारेजविरुद्ध अपील गरेको जनाउँदै जसरी भएपनि समान तलब पाउनुपर्ने बताएकी छिन् । ‘समान भुक्तानी भनेको महिला खेलाडीहरुलाई खेल जित्न समान दर भुक्तान गर्नु हो जसरी पुरुषहरुलाई भुक्तानी हुन्छ’ उनले भनेकी छिन् । २८ महिला फुटबल खेलाडीले गत वर्ष पुरुष खेलाडी बराबर तलब पाउनुपर्ने मागसहित मुद्दा दर्ता गरेका थिए । खेलाडीले युएस सकर फेडेरेसनलाई विपक्षी बनाएर अदालतमा मुद्दा दर्ता गरेका थिए ।

अदालतले मुद्दा खारेज गरेसँगै अमेरिकामा पछिल्लो समय यसलाई राजनीतिक मुद्दा बनाईएको छ । सरकार विपक्षी पार्टीहरुले महिला खेलाडीलाई समान तलब दिनु पर्ने माग राख्न थालेका छन् । अमेरिकाको महिला टिम गत वर्ष महिला विश्वकप जितेको थियो । यस्तै महिला टिमले पाँच पटक ओलम्पिकमा स्वर्ण पदक जितेका छन् ।