अखबार नेपाल ट्रेन्डिङ

रामेछाप: शिक्षा मन्त्रालयले आजबाट देशभरका सबै विद्यालयहरु बन्द गर्ने निर्णय गरेको भएपनि रामेछाप जिल्लामा भने कुनैपनि विद्यालयहरु बन्द भएका छैनन् ।

जिल्लाका ८ वटै स्थानीय तहहरुमा सञ्चालित सबै विद्यालयहरुमा आजपनि अरु दिन जस्तै नियमित रुपमा पठन पाठन भएको हो ।

कोरोना संक्रमणको दर बढेसँगै शिक्षा मन्त्रालयले आजबाट देशभरका सवै विद्यालयहरु बन्द गर्ने निर्णय गरेको थियो । उक्त निर्णयलाई रामेछापका सबै विद्यालयहरुले बेवास्ता गरेका छन् ।

जिल्लामा सञ्चालित सबै विद्यालयहरु खुला रहेको जिल्ला शिक्षा समन्वय इकाइ रामेछापका प्रमुख भरत भट्टराइले जानकारी दिए ।

उनले यस विषयमा स्थानीय सरकारले नै निर्णय गर्ने भएकाले आफुहरुको भुमिका नहुने बताए । सरकारको निर्णय भरखरै प्राप्त भएकाले यस विषयमा बैठक बसेर निर्णय गरिने रामेछापका प्रमुख जिल्ला अधिकारी दिपक पहाडीले बताए ।

रामेछाप जिल्लामा ३ सय ७९ वटा विद्यालयमा करिव ४४ हजार बालबालिकाहरु अध्ययनरत छन् ।

आफ्नो गाउँपालिकामा अहिले कुनैपनि विद्यालय बन्द नगरिएको उमाकुण्ड गाउँ पालिकाका अध्यक्ष शेरबहादुर सुनुवारले बताए ।

गाउँमा संक्रमणको डर नभएकाले आफ्नो गाउँ पालिकाको विद्यालयहरु सबै खुला रहेको खाँडादेवी गाउँ पालिकाका अध्यक्ष प्रेमबहादुर तामाङ्गले बताए ।

दोरम्बा गाउँपालिकाले भने भोलिदेखि विद्यालयहरु बन्द गर्ने निर्णय गरेको गाउँ पालिकाका अध्यक्ष कमान सिंह तामाङ्गले बताए ।

गोकुलगंगा गाउँपालिकाले तत्काल बैठक बसेर विद्यालय खोल्ने वा नखोल्ने भन्ने विषयमा निर्णय गर्ने गाउँपालिकाका अध्यक्ष खड्ग बहादुर सुनुवारले बताए ।

रामेछाप नगरपालिकाले पनि यस विषयमा बैठक बसेर टुंगो लगाउने भएको नगर प्रमुख नरबहादुर मगरले जानकारी दिए ।

सुनापति गाउँपालिकाले तत्काल बैठक बसेर शिक्षा मन्त्रालयको निर्देशनका बारेमा छलफल गर्ने गाउँ पालिकाका अध्यक्ष धावा लामाले बताए ।

मन्थली नगरपालिकाले भने भौतिक उपस्थितीमा नभइ बैकल्पिक विधिबाट सिकाइको कामलाई निरन्तरता दिनका लागि विद्यालयहरुलाई निर्देशन दिएको नगर प्रमुख रमेश बस्नेतले बताए ।