अखबार नेपाल ट्रेन्डिङ

काठमाडौं: अष्ट्रेलिया र जापानले अन्तर्राष्ट्रिय सीमा खुला गरेपछि अध्ययनका लागि जाने तयारीमा रहेका नेपाली विद्यार्थी उत्साहित भएका छन् ।

अष्ट्रेलियाले डिसेम्बर १ र जापानले नोभेम्बर ८ तारिखदेखि लागू हुनेगरी विद्यार्थी लगायत विभिन्न भिसा अन्तर्गत यात्रा गर्न चाहने यात्रुका लागि आवागमन खुला गर्ने निर्णय गरिसकेका छन् ।

राजधानीमा आयोजित पत्रकार सम्मेलनमा नेपाल शैक्षिक परामर्श संघ (इक्यान)का अध्यक्ष प्रकाश पाण्डेले जापान र अष्ट्रेलियाको घोषणाले नेपाली विद्यार्थी र शैक्षिक परामर्श व्यवसायीलाई खुशी दिलाएको बताए ।

उनका अनुसार अस्ट्रेलियाको लागि मात्र झन्डै ४ हजार नेपाली विद्यार्थीले अध्ययनका लागि भिसा लिएका छन् । वैदेशिक अध्ययनका लागि नेपाली विद्यार्थीको झन्डै ७ अर्ब रुपैयाँ लगानी भएको छ ।

अस्ट्रेलियामा अध्ययनका लागि भिसा पाएका झन्डै ४ हजार र जापानका लागि सीइओ पाएका ८ हजारभन्दा बढी विद्यार्थी उत्साहित छन् ।

कोभिड-१९ जोखिमका कारण लामो समयदेखि सीमा बन्द हुँदा कतिपय विद्यार्थी डलरमा शुल्क तिरेर नेपालमै बसेर अनलाइन कक्षा लिन बाध्य भएका थिए ।

जापान र अष्ट्रेलियाको नयाँ निर्णयपछि कोभिड-१९ विरुद्धको पूर्ण मात्रा खोप लगाई योग्य भिसा भएका अन्तर्राष्ट्रिय विद्यार्थी, दक्ष, शरणार्थी, मानवीय, अस्थायी र अस्थायी पारिवारिक भिसा भएकासहित यात्रा छुटका लागि आवेदन नगरी ती मुलुकमा जान सक्नेछन् ।