अखबार नेपाल ट्रेन्डिङ

काठमाडौं: प्रतिनिधिसभामा सभामुखमा उम्मेदवारी दिने नदिनेबारे निर्णय लिन नेपाली कांग्रेस संसदीय दलको बेठक बस्दैछ । कांग्रेसले यसअघि नै सभामुख र उपसभामुख मध्ये एक पदमा मात्रै उम्मेदवारी दिने बताइसकेको छ ।

सहमतीय राजनीतिक प्रणाली अनुसार नेकपाले कांग्रेसलाई उपसभामुख दिए सभामुखमा नेकपाकै उम्मेदवारलाई समर्थन गरिने कांग्रेसले जनाएको छ । संविधान अनुसार नै सभामुख र उपसभामुख फरक दल र लिङ्गको हुनुपर्ने भन्‍ने भएकोले सत्तापक्ष र प्रतिपक्ष मिलेर सहमतीय राजनीतिमा अघि बढ्ने कांग्रेसले जनाएको छ । नेकपाले उपसभामुखमा कांग्रेसलाई समर्थन नगरे संसदीय दलकी सचेतक पुष्पा भुसाललाई सभामुख उम्मेदवार बनाउने तयारी कांग्रेसको छ ।

यद्यपी कांग्रेसले यसबारे आधिकारिक निर्णय गरेको छैन । कांग्रेसले यसअघि कृष्णबहादुर महरा सभामुख हुँदा पनि उम्मेदवार उठाएको थिएन । संसद सचिवालयले सोमबार नै जारी गरेको निर्वाचन कार्यतालिकामा माघ १० गते दिउँसो २ बजे भित्र सभामुख पदको लागि उम्मेदवारी दिइसक्नुपर्ने उल्लेख छ । यसपटक कांग्रेसले लोकतान्त्रिक पद्दति अनुसार उम्मेदवारी दिने बताइएको छ ।