अखबार नेपाल ट्रेन्डिङ

प्रदेश ३ को राजधानी हेटौंडा घोषणा भएको छ । आइतबार बिहान प्रदेश नं. ३ को प्रदेशसभा बैठकले दुई तिहाइ मतका साथ स्थायी राजधानी हेटौंडा नै कायम गर्ने प्रस्ताव पास गरेको हो । जसमा प्रमुख विपक्षी नेपाली कांग्रेसँगै राप्रपा, राप्रपा संयुक्त र नेमकिपाले पनि समर्थन गरेका थिए ।

प्रदेशको नाम बागमती मात्र प्रस्ताव भएकाले त्यही नाम पक्का हुने भएको छ भने राजधानीका लागि मकवानपुरको हेटौंडाका साथै काभ्रेको धुलिखेल समेत प्रस्ताव भएकाले दुईमध्ये एक स्थानको टुंगो लगाउन मतदान भएको थियो । बलियो दुई तिहाइ रहेको सत्तारुढ नेकपासहित मुख्य दलले राजधानी हेटौंडाको पक्षमा मतदान गरेका थिए ।

प्रदेशसभामा हेटौंडाको विपक्षमा विवेकशील पार्टी मात्र उभिएको थियो । प्रदेशसभाका ११० सिटमध्ये सभामुख सानुकुमार श्रेष्ठले मतदान गरेनन् भने नयाँशक्तिबाट निर्वाचित तर पछिल्लो समय स्वतन्त्र रहेका सांसद् प्रेम तामाङ मतदान प्रक्रियामा अनुपस्थित थिए । मत परिणाम अनुसार हेटौंडाको पक्षमा १०५ मत र बिपक्षमा ३ मत परेको थियो । संविधान अनुसार प्रदेश सभामा रहेको ११० मत मध्ये दुई तिहाइ मत अर्थात ७४ प्रतिशत मतले प्रदेशको राजधानी र नाम टुंगो लगाउन सक्नेछ ।