अखबार नेपाल ट्रेन्डिङ

काठमाडौं: पूर्व प्रधानमन्त्री तथा नेकपा एमाले अध्यक्ष केपी शर्मा ओलीको रिहाइको माग गर्दै शनिबारदेखि संघर्षको घोषणा गरेको एमालेको आन्दोलनमा सीमित कार्यकर्ताको मात्रै सहभागिता रहेको देखिएको छ ।

पार्टी केन्द्रको तर्फबाट नै घोषणा गरिएको आन्दोलनमा पार्टी र जनवर्गीय संगठनका नेताहरूको सहभागिता भने देखिएको छैन । जसले गर्दा थोरै सहभागितामा निषेधित क्षेत्रमा गरिएको आन्दोलनमा धेरै कार्यकर्ता घाइते भइरहेका छन् । शनिबार बिहान पार्टी अध्यक्ष केपी ओली गिरफ्तार परेपछि पार्टी सचिवालयको बैठक बसेर निर्णय गर्दै पार्टीका महासचिव शंकर पोखरेलले नै आन्दोलनका कार्यक्रम सार्वजनिक गरेका थिए । साथै, अन्य पार्टीसँगको संवाद र कानुनी लडाइँका लागि पनि एमालेले कार्यविभाजन गरेको थियो ।

तर, आन्दोलनमा अध्यक्ष ओली बाहेकका १७ जना पदाधिकारीमध्ये कोहीपनि सहभागी भएका छैनन् । त्यस्तै, महासचिव पोखरेलले जनवर्गीय संगठनहरूको नेतृत्वमा आन्दोलन हुने भनिएकोमा कुनैपनि जनवर्गीय संगठनका नेता कार्यकर्ता पनि सडकमा देखिएका छैनन् । शनिबार काठमाडौंका बानेश्वरदेखि माइतीघरसम्म र चावहिल क्षेत्रमा प्रदर्शन गरेको एमालेको प्रदर्शन आइतबार बबरमहल र माइतिघर क्षेत्रमा मात्रै झण्डै २ सय जनामा खुम्चिएको थियो ।