अखबार नेपाल ट्रेन्डिङ

काठमाडौं: नेवाः पत्रकार दबुको आयोजनामा नेपाल पत्रकार महासंघका संस्थापक अध्यक्ष सत्यनारायण बहादुर श्रेष्ठको १०९औं जन्मजयन्तिको अवसरमा पत्रकार-कलाकारबीच सत्यनारायण बहादुर श्रेष्ठ स्मृति मिडियाकप फुटसल प्रतियोगिता आज हुँदैछ ।

आदर्श विद्या मन्दिर (AVM) को फुटसल मैदानमा हुने प्रतियोगितामा पुरुष टोली र महिला टोलि सहित ११ टोलिको सहभागिता रहनेछ । पुरुष टोलिमा नेवाः पत्रकार राष्ट्रिय दबू ‘A’, नेवाः पत्रकार राष्ट्रिय दबू ‘B’ नेपाल फोटोपत्रकार समुह (NFPJ), कलाकार टिम, ललितपुर महानगरपालिका १६ वडा कलाकार समिति टिम, राष्ट्रिय समाचार समिति (रासस) टिम, टिम AVM, आदिवासी जनजाति पत्रकार समुह (फोनिज टिम), वर्ल्ड नेवाः अर्गनाइजेशन नेपाः च्याप्टर सहित ९ टोलिको सहभागिता रहेको छ भने महिला टोलिमा महिला पत्रकार टिम र महिला कलाकार टिमको सहभागिता रहेको छ ।

सत्यनारायण बहादुर श्रेष्ठ २००८ सालमा नेपाल टुडेको सम्पादक थिए । उनैको सभापतित्व र तरंगका सम्पादक भोजबहादुर सिंह न्यौपाने सचिव रहेको पहिलो पत्रकार संघको गठन भएको थियो । यसैले नेपाल पत्रकार संघका पहिलो सभापति सत्यनारायण बहादुर श्रेष्ठ नै रहेको तर्क गर्न गरिएको छ । उनको सभापतित्वमा गठन भएको नेपाल पत्रकार संघको दोस्रोसभा २००९ साल वैशाख २८ गते भोटाहिटीस्थित आर्य समाजको भवनको सभाकक्षमा भएको थियो । यो सभाले पनि सत्यनारायण बहादुर श्रेष्ठकै सभापतित्वमा नेपाल पत्रकार संघ पुनर्गठन गरेको थियो ।

यसको तीन वर्षपछि मात्र दोस्रो नेपाल पत्रकार संघको गठन भएको थियो । २०१२ साल चैत्र १६ गते पत्रकारहरुको बैठकबाट नेपाल पुकारका तत्कालीन सम्पादक कृष्णप्रसाद उपाध्याय भट्टराई सभापति बनेका थिए । सत्यनारायणबहादुर श्रेष्ठभन्दा चार बर्षपछि मात्रै नेपाल पत्रकार संघको अध्यक्ष बनेका कृष्णप्रसाद भट्टराईलाई संस्थापक सभापति भन्ने गरिएको छ ।