अखबार नेपाल ट्रेन्डिङ

काठमाडौं: केही स्थानीय तहका पालिकाहरूले जनयुद्ध दिवसको अवसर भन्दै फागुन १ मा सार्वजनिक बिदाको घोषणा गरेपछि गृह मन्त्रालयले उक्त दिन सार्वजनिक बिदा कायम नरहेको स्पष्ट पारेको छ । गृहमन्त्रालयले सोमबार एक विज्ञप्ति जारी गर्दै सर्वोच्च अदालतको फैसलाका आधारमा  फागुन १ मा कुनै सार्वजनिक बिदा नरहेको स्पष्ट पारेको हो ।

मन्त्रिपरिषद‍्को मिति २०८०/१०/२५ गतेको बैठकको निर्णय अनुसार नेपाल राजपत्र खण्ड ७२, संख्या ६५, भाग ५, मिति २०७९/१२/०२ मा प्रकाशित संवत् २०८० फागुन १ गते मंगलबारका लागि निर्धारण गरिएको सार्वजनिक बिदा कायम नरहेको व्यहोरा सम्वद्ध सबैको जानकारी गराइन्छ । मन्त्रालयका सहसचिव  नारायणप्रसाद भट्टराईले जारी गरेको विज्ञप्तिमा भनिएको छ ।

यसअघि पुष्पकमल दाहाल ‘प्रचण्ड’ नेतृत्वको संघीय सरकारले जनयुद्ध दिवसका अवसरमा फागुन १ गतेलाई सार्वजनिक बिदा दिने निर्णय गरेको थियो । चौतर्फी विरोधपछि सो निर्णयविरुद्ध सर्वोच्च अदालतमा रिट परेको थियो । सर्वोच्चले उक्त रिटमाथि सुनुवाइ गर्दै जनयुद्ध दिवसको नाममा फागुन १ मा दिएको सार्वजनिक बिदा संविधानको भावना र मर्मविपरीत ठहर गर्दै खारेज गरिदिएको थियो ।

तर, अदालतको आदेशविपरीत माओवादी केन्द्रले जितेका विभिन्न स्थानीय तहले जनयुद्ध दिवसको नाममा फागुन १ मा धमाधम सार्वजनिक बिदा घोषणा गरेका छन् । स्थानीय तहले बिदा दिन थालेपछि पुन: आलोचना सुरू भएको छ ।